Khua Pô Mtô - Đoạn 7

1. Sa anăn hing ang jăk jing jăk hĭn kơ êa mñak yuôm, leh anăn hruê djiê jing jăk hĭn kơ hruê kkiêng.

2. Jing jăk hĭn nao kơ sang kơŭ kyăm hŏng nao kơ sang klei huă mnăm. Kyuadah klei djiê jing klei knhal tuč kơ jih jang mnuih, leh anăn phung hdĭp srăng hdơr mĭn kơ klei anăn.

3. Klei ênguôt jing jăk hĭn kơ klei tlao, kyuadah hŏng ƀô̆ mta ênguôt ai tiê mâo klei mơak.

4. Ai tiê pô thâo mĭn dôk hlăm sang kơŭ kyăm; ƀiădah ai tiê phung mluk dôk hlăm sang hlăp.

5. Jăk hĭn kơ sa čô mnuih dôk hmư̆ klei phung thâo mĭn ƀuah hŏng dôk hmư̆ klei phung mluk mmuñ.

6. Kyuadah msĕ si ênai pui ƀơ̆ng êruê ti gŭ gŏ, msĕ snăn mơh klei phung mluk tlao hơ̆k; klei anăn msĕ mơh jing klei hơăi mang.

7. Sĭt nik klei ktư̆ juă brei pô thâo mĭn jing hĕ mnuih mluk, leh anăn ngăn sun bi msoh kơ ai tiê.

8. Klei knhal tuč sa klei jing jăk hĭn kơ klei mphŭn dơ̆ng, leh anăn klei thâo gĭr jing jăk hĭn kơ klei mgao.

9. Đăm ruăt ngêñ ôh, kyuadah klei ngêñ dôk hlăm ai tiê phung mluk.

10. Đăm lač ôh, “Si ngă ênuk mphŭn dô jing jăk hĭn kơ ênuk anei?” Kyuadah amâo djŏ ôh jing hŏng klei thâo mĭn êmuh klei anăn.

11. Klei thâo mĭn jing jăk msĕ si ngăn dưn, sa klei tŭ dưn kơ phung ƀuh yang hruê.

12. Klei thâo mĭn dưi mgang msĕ si prăk dưi mgang; leh anăn klei tŭ dưn mơ̆ng klei thâo săng jing snei: klei thâo mĭn anăn mgang klei hdĭp pô mâo klei thâo mĭn.

13. Ksiêm bĕ bruă Aê Diê ngă leh: Hlei dưi bi kpă mnơ̆ng Aê Diê mjing wê leh?

14. Êjai hruê mâo klei čăt đĭ hơ̆k mơak bĕ, leh anăn hlăm hruê mâo klei knap mñai ksiêm mĭn bĕ; Aê Diê sơăi mjing leh jih dua klei anăn, čiăng kơ mnuih amâo dưi thâo ôh ya klei srăng truh kơ ñu êdei.

15. Hlăm klei hdĭp hơăi mang kâo, kâo ƀuh leh jih jang klei: mâo sa čô mnuih kpă rai tuč hlăm klei kpă ênô ñu, leh anăn mâo sa čô mnuih ƀai bi sui klei hdĭp ñu hlăm klei ngă jhat.

16. Đăm jing kpă êgao hnơ̆ng ôh, leh anăn đăm mjing ih pô thâo mĭn đei ôh; ya yuôm ih bi rai ih pô lĕ?

17. Đăm jing ƀai êgao hnơ̆ng ôh, kăn jing sa čô mluk rei; ya yuôm ih djiê êlâo hruê bi kčah?

18. Jing jăk kơ ih kơ̆ng klei anei, leh anăn amâo phưi klei mkăn; kyuadah mnuih huĭ mpŭ kơ Aê Diê srăng mâo klei dưi hlăm jih dua.

19. Klei thâo mĭn brei klei ktang kơ mnuih thâo mĭn kdlưn hĭn kơ pluh čô khua kiă kriê hlăm sa boh ƀuôn.

20. Sĭt nik ti lăn ala amâo mâo ôh sa čô mnuih kpă ênô, pô ngă jăk leh anăn amâo tuôm ngă soh ôh.

21. Đăm mđing ôh kơ jih jang klei phung mnuih lač, huĭdah ih hmư̆ dĭng buăl ih tăm pah kơ ih;

22. kyuadah ai tiê ih pô thâo leh mâo lu bliư̆ ih tuôm tăm pah leh kơ phung mkăn.

23. Kâo lông dlăng leh hŏng klei thâo mĭn jih jang klei anei; kâo lač: “Kâo srăng jing thâo mĭn”, ƀiădah klei thâo mĭn jing kbưi hŏng kâo.

24. Ñu jing kbưi, êlam, êlam snăk, hlei pô dưi thâo săng klei anăn?

25. Kâo pioh klei mĭn čiăng thâo leh anăn tui duah čiăng ƀuh klei thâo mĭn leh anăn klei mblang kơ jih jang mnơ̆ng, leh anăn čiăng thâo klei ƀai mơ̆ng klei mluk, leh anăn klei mluk jing klei khŏ.

26. Kâo ƀuh leh mâo klei ênguôt ktrŏ hĭn kơ klei djiê, jing sa čô mniê mâo ai tiê mnêč leh anăn thâo mplư, leh anăn kngan ñu jing sa klei săng đai; pô bi mơak kơ Aê Diê dưi tlaih mơ̆ng ñu, ƀiădah ñu dưi mâo mă mnuih soh.

27. Khua Pô Mtô lač, nĕ anei klei kâo ƀuh: Ksiêm sa klei hŏng sa klei mkăn dưi ƀuh klei mblang,

28. klei anăn klei mĭn kâo duah nanao, ƀiădah amâo thâo ƀuh ôh. Ti krah sa êbâo čô êkei kâo ƀuh sa čô kpă, ƀiădah kâo amâo ƀuh ôh sa čô mniê kpă ti krah jih jang phung mniê.

29. Nĕ anei, knŏng klei anei kâo ƀuh, Aê Diê mjing leh mnuih kpă, ƀiădah diñu tui duah lu klei wê.