Klei Mmuñ Hđăp - Đoạn 82

1. Aê Diê dôk dơ̆ng hlăm klei bi kƀĭn Aê Diê; ñu phat kđi ti krah phung yang.

2. Dŭm boh sui diih srăng phat kđi hŏng klei wê, leh anăn dôk tĭng kơ phung ƀai? (Sêla)

3. Brei klei kpă kơ phung ƀun ƀin leh anăn kơ phung êrĭt; ngă klei djŏ kơ phung knap mñai leh anăn phung kƀah mnơ̆ng.

4. Bi mtlaih phung awăt leh anăn phung ƀun; bi êngiê digơ̆ mơ̆ng kngan phung ƀai.

5. Diñu amâo mâo klei thâo ôh, kăn thâo săng rei; diñu êrô hiu hlăm klei mmăt; jih jang tur lăn ala mgei leh.

6. Kâo lač leh, diih jing phung yang, jih jang diih jing phung anak Pô Ti Dlông Hĭn.

7. Ƀiădah diih srăng djiê msĕ si mnuih, diih srăng lĕ msĕ si sa čô anak mtao.

8. Kgŭ bĕ, Ơ Aê Diê, phat kđi lăn ala; kyuadah jih jang phung găp djuê mnuih jing dŏ ih.