Klei Mmuñ Hđăp - Đoạn 75

1. Hmei bi mni kơ ih, Ơ Aê Diê, hmei bi mni kơ ih; kyuadah anăn ih dôk giăm hmei; phung mnuih hưn bruă yuôm bhăn ih.

2. Tơdah truh hruê kâo bi kčah leh, kâo srăng phat kđi hŏng klei kpă.

3. Tơdah lăn ala ktư̆ yơ̆ng mbĭt hŏng jih phung dôk hlăm ñu; jing kâo yơh bi kjăp kmeh ñu. (Sêla)

4. Kâo lač kơ phung mgao, đăm mgao ôh; leh anăn kơ phung ƀai, đăm ngă jhŏng ôh.

5. Đăm kngưr kŏ ngă jhŏng ôh, leh anăn đăm blŭ klei mgao ôh.

6. Kyuadah klei bi mđĭ amâo kbiă hriê mơ̆ng ngŏ, mơ̆ng yŭ ôh, kăn djŏ mơ̆ng dhŭng rei.

7. Ƀiădah Aê Diê yơh jing pô phat kđi; ñu mdlưh sa čô anei, ñu mđĭ pô mkăn.

8. Kyuadah hlăm kngan Yêhôwa mâo sa atŏ, hlăm anăn mâo kpiê, kbhoh, ktang, ñu srăng hlĭng brei arăng mnăm, jih jang phung ƀai hlăm lăn ala srăng huč mnăm tơl jih.

9. Bi kâo dê, kâo srăng hưn nanao, leh anăn mmuñ bi mni kơ Aê Diê Y-Yakôp.

10. Kâo srăng bi rai jih klei ktang phung ƀai; ƀiădah srăng bi mđĭ klei ktang phung kpă.