Klei Mmuñ Hđăp - Đoạn 69

1. Bi mtlaih kâo, Ơ Aê Diê; kyuadah êa lip đĭ truh ti kkuê kâo.

2. Kâo kdlŭt hlăm lŭ êlam, tinăn amâo mâo anôk juă jơ̆ng ôh. Kâo truh leh ti anôk êa êlam, leh anăn êa lip guôm kâo.

3. Kâo êmăn leh kyua ur; đŏk kâo thu leh. Ală kâo dliu leh kyua dôk guôn Aê Diê kâo.

4. Phung bi êmut kơ kâo amâo mâo klei jing lu hĭn kơ ƀŭk ti dlông boh kŏ kâo; phung čiăng bi rai kâo amâo mâo klei jing jhŏng ktang, ya mnơ̆ng kâo amâo tuôm tlĕ ôh, arăng brei kâo lŏ čiu.

5. Ơ Aê Diê, ih thâo kral leh klei mluk kâo; klei soh kâo amâo hgăm kơ ih ôh.

6. Đăm brei ôh phung čang hmăng hlăm ih hêñ kyua kâo, Ơ Khua Yang, Yêhôwa kơ phung kahan. Đăm brei ôh phung duah ih hêñ kyua kâo, Ơ Aê Diê phung Israel.

7. Kyua ih kâo gui klei arăng dlao wač, klei hêñ guôm ƀô̆ mta kâo.

8. Kâo jing hĕ tue kơ phung ayŏng adei kâo, sa čô pô ti êngao hlăm phung anak amĭ kâo.

9. Kyuadah klei hur har kơ sang yang ih čuh kâo, leh anăn klei arăng dlao wač kơ ih lĕ leh ti kâo.

10. Tơdah kâo luă gŭ kâo pô hŏng klei kăm ƀơ̆ng huă, klei anăn jing klei bi hêñ kâo.

11. Tơdah kâo hơô klŭng, kâo jing mnơ̆ng diñu djă djik djak.

12. Phung dôk gŭ ti ƀăng jang bi blŭ mưč kơ kâo, leh anăn phung kpiê ruă mmuñ bi hlă kơ kâo.

13. Ƀiădah kâo wah lač leh kơ ih, Ơ Yêhôwa. Ti hruê găl, Ơ Aê Diê, hlăm klei khăp ih êbeh dlai, lŏ wĭt lač bĕ kơ kâo hŏng klei sĭt nik klei ih bi mtlaih.

14. Ktŭng kâo mơ̆ng lŭ kdlŭt, đăm brei kâo kngăm ôh, bi mtlaih kâo bĕ mơ̆ng phung bi êmut kơ kâo, leh anăn mơ̆ng êa êlam.

15. Đăm brei êa lip guôm kâo, kăn brei ƀăng êa êlam lun kâo rei, leh anăn đăm brei ôh ƀăng êlam sir hĕ ti dlông kâo.

16. Lŏ wĭt lač kơ kâo, Ơ Yêhôwa; kyuadah klei khăp ih jing jăk; tui si klei pap prŏng ih, wir dlăng kơ kâo đa.

17. Đăm mdăp ƀô̆ mta ih mơ̆ng dĭng buăl ih; kyuadah kâo dôk hlăm klei knap mñai, brei ih ruăt lŏ wĭt lač kơ kâo.

18. Hriê giăm leh anăn bi tui mngăt kâo, bi êngiê kâo kyua phung roh kâo.

19. Ih thâo leh klei kâo hêñ, ŏ guam leh anăn arăng amâo mpŭ kơ kâo ôh; ih thâo leh jih jang phung roh kâo.

20. Klei arăng dlao wač bi mčah leh ai tiê kâo; snăn kâo êdu ai. Kâo duah klei pap, ƀiădah amâo mâo ôh; kâo duah phung bi juh, ƀiădah kâo amâo ƀuh sa čô ôh.

21. Diñu brei êa phĭ jing mnơ̆ng kâo ƀơ̆ng huă; leh anăn tơdah kâo mhao, diñu brei kâo mnăm êa msăm.

22. Brei jhưng huă ti anăp diñu jing kđông ƀêč kơ diñu; leh anăn jing ñuăl ti krah klei êđăp ênang diñu.

23. Bi mmăt hĕ ală diñu tơl diñu amâo thâo ƀuh ôh; leh anăn brei kơiêng diñu ktư̆ yơ̆ng nanao.

24. Tuh ti diñu klei ih ngêñ, leh anăn brei klei ih ăl hmao diñu.

25. Brei anôk diñu dôk jing ênguôl, đăm brei mâo mnuih dôk hlăm sang čhiăm diñu ôh.

26. Kyuadah diñu ngă jhat kơ pô ih čăm leh, leh anăn yăl dliê klei knap kơ phung ih bi êka leh.

27. Lŏ thiăm klei soh kơ klei soh diñu; leh anăn đăm brei ih yap diñu kpă ênô ôh.

28. Lăm hĕ anăn diñu mơ̆ng hdruôm hră klei hdĭp; leh anăn đăm čih anăn diñu ôh mbĭt hŏng phung kpă ênô.

29. Ƀiădah kâo knap mñai leh anăn ruă snăk; Ơ Aê Diê, brei klei bi mtlaih ih rŭ kâo.

30. Kâo srăng bi mni kơ anăn Aê Diê hŏng klei mmuñ; kâo srăng mpŭ mni kơ ñu hŏng klei hdơr knga.

31. Klei anăn srăng bi mơak kơ Yêhôwa êgao hĭn kơ klei ngă yang hŏng êmô, êgao hĭn kơ sa drei êmô knô mâo ki leh anăn kčuôp.

32. Phung ƀun ƀin ƀuh klei anăn leh anăn mơak; Ơ phung duah Aê Diê, brei ai tiê diih hdĭp.

33. Kyuadah Yêhôwa dôk hmư̆ phung kƀah mnơ̆ng, leh anăn ñu amâo bi êmut ôh kơ phung ñu mjing mnă leh.

34. Brei adiê leh anăn lăn ala bi mni kơ ñu, wăt êa ksĭ leh anăn mnơ̆ng kpư̆ hiu hlăm anăn.

35. Kyuadah Aê Diê srăng bi mtlaih ƀuôn Siôn leh anăn lŏ mdơ̆ng jih jang ƀuôn prŏng Yuđa; phung dĭng buăl ñu srăng dôk tinăn, leh anăn mă bha lăn anăn.

36. Phung anak čô phung dĭng buăl ñu srăng dưn čar anăn; leh anăn phung khăp kơ anăn ñu srăng dôk tinăn.