Klei Mmuñ Hđăp - Đoạn 37

1. Đăm rŭng răng ôh kyua phung ngă ƀai, kăn tluh kơ phung ngă klei soh rei.

2. Amâo sui ôh diñu srăng dliu msĕ si rơ̆k, leh anăn krô msĕ si rơ̆k mtah.

3. Knang bĕ kơ Yêhôwa leh anăn ngă klei jăk; dôk bĕ hlăm čar leh anăn hdĭp hŏng klei sĭt suôr Ñu.

4. Mơak bĕ hlăm Yêhôwa, leh anăn ñu srăng brei kơ ih klei ai tiê ih čiăng.

5. Jao êlan ih kơ Yêhôwa; knang kơ ñu, leh anăn ñu srăng ngă klei anăn.

6. Ñu srăng bi êdah klei kpă ênô ih msĕ si klei mngač, leh anăn klei djŏ ih msĕ si yang hruê dơ̆ng.

7. Dôk kriêp ti anăp Yêhôwa, leh anăn čang guôn kơ ñu; đăm rŭng răng ôh kyua sa čô dưi hlăm klei ñu ngă, kyua pô dưi ngă klei jhat ñu čiăng.

8. Đăm ăl ôh, lui klei ngêñ! Đăm rŭng răng ôh; klei anăn srăng atăt ih knŏng kơ klei jhat.

9. Kyuadah arăng srăng bi rai hĕ phung ƀai; ƀiădah phung čang guôn kơ Yêhôwa srăng dưn lăn ala.

10. Adôk ƀiă amâo srăng lŏ ƀuh phung ƀai ôh; wăt tơdah ih duah bi nik ti anôk diñu dôk leh, diñu amâo lŏ dôk tinăn ôh.

11. Ƀiădah phung luă gŭ srăng mă bha lăn čar, leh anăn srăng dôk hơ̆k mơak kyua mâo mnơ̆ng êbeh dlai.

12. Pô ƀai trông čhai čiăng ngă kơ pô kpă, leh anăn ñu kriêt êgei čiăng ngă kơ gơ̆.

13. Ƀiădah Yêhôwa tlao mưč kơ pô ƀai, kyuadah ñu ƀuh hruê pô ƀai srăng rai.

14. Phung ƀai suê̆ đao gưm leh anăn ƀêč hna diñu, čiăng bi êbuh pô ƀun ƀin leh anăn pô kƀah mnơ̆ng, čiăng bi mdjiê phung êbat hŏng klei kpă.

15. Đao gưm diñu srăng tlŏ tiê boh diñu pô, leh anăn hna diñu srăng joh hĕ.

16. Ƀiă mnơ̆ng pô kpă mâo jing jăk hĭn kơ mnơ̆ng êbeh dlai lu phung ƀai mâo.

17. Kyuadah păl phung ƀai arăng srăng bi joh; ƀiădah Yêhôwa krơ̆ng phung kpă.

18. Yêhôwa thâo hruê phung kpă, leh anăn ngăn dưn diñu srăng dôk nanao.

19. Diñu amâo hêñ ôh êjai klei knap mñai, hlăm hruê ư̆ êpa diñu mâo mnơ̆ng êbeh dlai.

20. Ƀiădah phung ƀai srăng rai tuč; phung roh Yêhôwa jing msĕ si klei siam kdrăn rơ̆k: diñu rai tuč, luč msĕ si săp pui.

21. Pô ƀai čan leh anăn amâo bi wĭt ôh, ƀiădah pô kpă thâo kmah leh anăn ñu brei čan.

22. Kyuadah phung Aê Diê hơêč hmưi leh srăng mă bha lăn čar, ƀiădah phung ñu tăm pah arăng srăng bi rai hĕ.

23. Yêhôwa atăt gai knhuang sa čô mnuih, leh anăn ñu bi kjăp pô êbat hlăm êlan bi mơak kơ ñu.

24. Wăt tơdah digơ̆ êbuh, digơ̆ amâo srăng rai ôh, kyuadah Yêhôwa krơ̆ng digơ̆ hŏng kngan ñu.

25. Kâo jing leh hlăk ai, ară anei kâo mduôn leh; ƀiădah kâo amâo tuôm ƀuh ôh arăng lui hĕ pô kpă, amâodah ƀuh phung anak ñu hiu dan akâo mnơ̆ng ƀơ̆ng huă.

26. Ñu thâo brei pap leh anăn brei arăng čan nanao, leh anăn phung anak ñu jing akŏ klei jăk jĭn.

27. Lui klei jhat leh anăn ngă klei jăk; snăn ih srăng dôk hlăm lăn čar hlŏng lar.

28. Kyuadah Yêhôwa khăp kơ klei kpă; ñu amâo srăng lui ôh phung doh jăk ñu. Ñu kiă kriê phung kpă nanao, ƀiădah phung anak pô ƀai arăng srăng bi rai hĕ.

29. Phung kpă srăng dưn čar, leh anăn diñu srăng dôk tinăn nanao.

30. Ƀăng êgei pô kpă ênô blŭ klei thâo mĭn, leh anăn êlah ñu hưn klei kpă.

31. Klei bhiăn Aê Diê ñu dôk hlăm ai tiê ñu; jơ̆ng ñu amâo ksak ôh.

32. Pô ƀai kăp ngă kơ pô kpă ênô, leh anăn duah bi mdjiê gơ̆.

33. Yêhôwa amâo srăng lui gơ̆ hlăm kngan pô ƀai ôh, amâodah lui arăng bi kmhal gơ̆ ti hruê phat kđi.

34. Čang guôn bĕ kơ Yêhôwa, tui êlan ñu, leh anăn ñu srăng brei ih dưi dưn lăn čar; ih srăng ƀuh tơdah arăng bi rai phung ƀai.

35. Kâo ƀuh leh pô ƀai ngă hŏng klei ktang, ñu jing dlông msĕ si sa ƀĕ ana kyâo sêdar.

36. Ƀiădah kâo lŏ găn, leh anăn nĕ anei, ñu amâo lŏ dôk tinăn ôh; wăt tơdah kâo duah ñu leh, kâo amâo dưi ƀuh ñu ôh.

37. Ksiêm bĕ kơ mnuih jăk leh anăn dlăng kơ mnuih kpă, kyuadah anak čô sa čô mnuih êđăp ênang srăng dôk nanao.

38. Ƀiădah phung gao klei bhiăn srăng rai jih; arăng srăng bi rai anak čô pô ƀai.

39. Klei bi mtlaih phung kpă kbiă hriê mơ̆ng Yêhôwa; ñu jing anôk đuĕ dăp kơ digơ̆ êjai mâo klei knap mñai.

40. Yêhôwa đru digơ̆ leh anăn bi mtlaih digơ̆; ñu dŏng digơ̆ mơ̆ng phung ƀai leh anăn bi êngiê digơ̆, kyuadah digơ̆ đuĕ dăp hlăm ñu.