Klei Mmuñ Hđăp - Đoạn 146

1. Bi mni kơ Yêhôwa; Ơ mngăt kâo, bi mni bĕ kơ Yêhôwa!

2. Kâo srăng bi mni kơ Yêhôwa jih hruê kâo dôk hdĭp; kâo srăng mmuñ bi mni kơ Aê Diê kâo êjai kâo dôk hdĭp.

3. Đăm knang kơ phung khua kiă kriê ôh, phung mnuih thâo djiê, phung amâo dưi đru ôh.

4. Tơdah êwa diñu tuč, diñu wĭt kơ ƀruih lăn; ti hruê anăn hdră diñu čiăng ngă rai luč jih.

5. Jăk mơak yơh pô mâo Aê Diê Y-Yakôp đru, pô čang hmăng hlăm Yêhôwa Aê Diê ñu,

6. pô hrih adiê leh anăn lăn ala, êa ksĭ leh anăn jih jang mnơ̆ng hlăm diñu, Yêhôwa, pô dôk sĭt suôr hlŏng lar.

7. Ñu ngă klei djŏ kơ phung arăng ktư̆ juă, leh anăn brei mnơ̆ng ƀơ̆ng huă kơ phung êpa. Yêhôwa bi êngiê phung mnă.

8. Yêhôwa mblang ală phung bum, Yêhôwa lŏ bi kơrŭ phung gô leh. Yêhôwa khăp kơ phung kpă ênô.

9. Yêhôwa kiă kriê phung tue, ñu krơ̆ng phung anak êrĭt leh anăn mniê djiê ung, ƀiădah ñu bi rai êlan phung ƀai.

10. Yêhôwa srăng kiă kriê hlŏng lar, Aê Diê ih, Ơ ƀuôn Siôn, kiă kriê hlăm jih jang ênuk. Bi mni bĕ kơ Yêhôwa!