Klei Mmuñ Hđăp - Đoạn 111

1. Bi mni kơ Yêhôwa. Kâo srăng bi mni kơ Yêhôwa hŏng jih ai tiê kâo hlăm klei bi kƀĭn phung kpă.

2. Jih bruă Yêhôwa jing prŏng êdi! jih jang phung mơak hŏng bruă anăn duah čiăng thâo săng digơ̆.

3. Bruă ñu bŏ hŏng klei mpŭ leh anăn klei kdrăm; leh anăn klei kpă ênô ñu dôk hlŏng lar.

4. Ñu brei arăng hdơr kơ bruă yuôm bhăn ñu ngă leh; Yêhôwa jing jăk leh anăn thâo pap.

5. Ñu brei mnơ̆ng ƀơ̆ng huă kơ phung huĭ mpŭ kơ ñu; ñu hdơr nanao kơ klei ñu bi mguôp.

6. Ñu bi êdah leh kơ phung ƀuôn sang ñu klei myang bruă ñu, êjai jao kơ digơ̆ ngăn dưn phung găp djuê mnuih.

7. Bruă kngan ñu jing sĭt suôr leh anăn kpă; arăng dưi knang kơ jih klei ñu čih leh.

8. Klei ñu čih dôk kjăp hlŏng lar, brei leh hŏng klei sĭt nik leh anăn klei kpă.

9. Ñu brei leh klei bi tui kơ phung ƀuôn sang ñu; ñu ngă klei bi mguôp hlŏng lar, Anăn ñu doh jăk leh anăn năng huĭ.

10. Klei huĭ mpŭ kơ Yêhôwa jing Klei mphŭn dơ̆ng kơ klei thâo mĭn; hlei pô tui ngă klei ñu mtă mâo klei thâo săng jăk. Klei bi mni kơ ñu dôk hlŏng lar.