Klei Mmuñ Siam Hĭn - Đoạn 1

1. Klei mmuñ siam hĭn kơ jih klei mmuñ, jing klei Y-Salômôn mmuñ.

2. Ơ čiăng kơ ih čŭm kâo hŏng ƀăng kƀông ih! Kyuadah klei ih khăp jing jăk hĭn kơ kpiê,

3. êa mñak ih ƀâo mngưi, anăn ih jing msĕ si êa ƀâo mngưi arăng trôč; kyuanăn yơh phung mniê êra hrông khăp kơ ih.

4. Atăt ba kâo mbĭt hŏng ih, brei drei ruăt bĕ. Mtao atăt kâo leh kơ adŭ ñu pĭt.

5. Kâo jing jŭ dưn mơh, ƀiădah kâo kƀăt, Ơ phung anak mniê ƀuôn Yêrusalem, jŭ msĕ si sang čhiăm phung Kêdar, msĕ si sang čhiăm păng mtao Y-Salômôn.

6. Đăm dlăng kơ kâo kyua klĭt kâo jŭ ôh, kyuadah mđiă bi jŭ leh kâo. Phung anak êkei amĭ kâo ăl kơ kâo, diñu brei kâo jing pô kiă đang boh kriăk ƀâo; ƀiădah đang boh kriăk ƀâo kâo pô, kâo amâo răng kriê ôh!

7. Ơ pô kâo khăp, hưn bĕ kơ kâo, ti anôk ih kiă biăp ih, ti anôk ih brei biăp ih đih êjai yang hruê dơ̆ng? Kyuadah ya yuôm kâo jing msĕ si sa čô mniê guôm ƀô̆ dôk mbĭt hŏng phung biăp phung găp ih?

8. Tơdah ih amâo thâo ôh, Ơ mniê siam hĭn kơ phung mniê mkăn, tui bĕ kru biăp, leh anăn čiêm bĕ phung êđai bê ih giăm sang čhiăm phung mgăt biăp.

9. Ơ pô kâo khăp, kâo bi msĕ ih hŏng sa drei aseh ana đoh êdeh Pharaôn.

10. Miêng ih jing siam hŏng buê ti knga, kkuê ih siam mơh hŏng băk boh tâo yuôm.

11. Hmei srăng mkra kơ ih buê mah, mƀlir asăr prăk mbĭt.

12. Êjai mtao dôk đih ti jhưng ñu, êa mñak kâo hŭl mnâo ƀâo mngưi.

13. Pô kâo khăp jing kơ kâo msĕ si sa anŭng mnơ̆ng ƀâo mngưi, dôk ti plah wah ksâo kâo.

14. Pô kâo khăp jing kơ kâo msĕ si sa čăp mnga hêna ti phŭn boh kriăk ƀâo Êngêdi.

15. Nĕ anei, ih jing siam, Ơ pô kâo khăp, nĕ anei, ih jing siam êdi yơh; ală ih jing msĕ si mgăm.

16. Nĕ anei, ih jing siam, Ơ pô kâo khăp, ih kƀăt êdi.

17. êda sang drei ngă hŏng kyâo sêdar, leh anăn kkal jing kyâo hngô.