Klei Bi Hriêng - Đoạn 31

1. Klei mtao Y-Lemuêl blŭ; klei bi hriêng amĭ ñu bi hriăm ñu.

2. Ya kâo srăng lač kơ ih, Ơ anak êkei kâo? Ya kâo srăng lač kơ ih, Ơ anak êkei mơ̆ng tian prôč kâo pô? Ya kâo srăng lač kơ ih, Ơ anak êkei kâo, pô kâo wah lač akâo?

3. Đăm bi luč ôh klei mơai ih hŏng phung mniê, amâodah ngă mbĭt hŏng phung bi rai hĕ phung mtao.

4. Ơ Y-Lemuêl, amâo jăk ôh kơ phung mtao mnăm kpiê, kăn jăk rei kơ phung khua kiă kriê duah kpiê ktang,

5. huĭdah êjai mnăm diñu wơr bĭt klei mtă, leh anăn bi msoh klei phat kđi kơ phung knap mñai.

6. Brei kpiê ktang kơ phung dơ̆ng djiê leh, leh anăn kpiê kơ phung mâo klei ênguôt snăk.

7. Brei diñu mnăm leh anăn wơr bĭt hĕ klei diñu ƀun ƀin, leh anăn amâo lŏ hdơr ôh kơ klei knap diñu.

8. Ha ƀăng êgei ih blŭ brei kơ mnuih kmlô, čiăng ngă klei djŏ kơ phung amâo mâo pô đru ôh.

9. Ha ƀăng êgei ih blŭ kđi hŏng klei kpă mgang klei djŏ kơ phung knap mñai leh anăn ƀun ƀin.

10. Hlei dưi duah sa čô mniê năng mpŭ? Ñu jing yuôm hĭn kơ boh tâo mngač.

11. Ai tiê ung ñu knang kơ ñu, leh anăn gơ̆ amâo srăng kƀah boh mnga ôh.

12. Ñu ngă jăk kơ gơ̆, amâo djŏ klei jhat ôh, jih jang hruê ñu dôk hdĭp.

13. Ñu duah mrai mlâo biăp leh anăn mrai kbuă, leh anăn kriăng mă bruă hŏng kngan.

14. Ñu jing msĕ si kŭmpăn phung mblei mnia, ba mnơ̆ng ƀơ̆ng huă ñu mơ̆ng kbưi.

15. Ñu kgŭ pĭt êjai adiê ăt dôk mmăt, leh anăn brei mnơ̆ng ƀơ̆ng huă kơ phung hlăm sang ñu, leh anăn bi mbha mnơ̆ng ƀơ̆ng huă kơ phung dĭng buăl mniê ñu.

16. Ñu dlăng kơ sa boh hma leh anăn blei hma anăn; hŏng boh mnga mơ̆ng bruă ñu ngă, ñu pla đang boh kriăk ƀâo.

17. Ñu hyuă kơiêng leh anăn kriăng mă bruă, păl ñu ktang dưi ngă bruă.

18. Ñu ƀuh mnơ̆ng ñu čhĭ mâo klei tŭ dưn, ñu amâo bi mdjiê ôh pui kđen ñu êjai mlam.

19. Ñu êwei mrai, leh anăn mñam čhiăm.

20. Ñu brei mnơ̆ng pap kơ phung knap mñai, leh anăn ñu yơr brei mơh kơ phung ƀun ƀin.

21. Ñu amâo huĭ ôh kơ pliêr ngă kơ phung hlăm sang ñu, kyuadah jih jang digơ̆ hơô leh čhiăm ao mlâo biăp.

22. Ñu ngă lu blah abăn, čhiăm ao ñu hơô ngă leh hŏng kbuă điêt aruăt leh anăn hŏng čhiăm hrah piơk.

23. Arăng thâo kral ung ñu ti ƀăng jang ƀuôn, tơdah gơ̆ dôk gŭ mbĭt hŏng phung khua mduôn hlăm čar.

24. Ñu mñam ao, čhĭ ao anăn, leh anăn ñu čhĭ hdrăng kơiêng kơ pô mnia.

25. Ñu mâo klei ktang leh anăn klei arăng mpŭ; leh anăn dưi tlao amâo huĭ ôh kơ klei truh hruê êdei.

26. Ñu ha ƀăng êgei ñu blŭ hŏng klei thâo mĭn, leh anăn ñu mtô hŏng klei êmhač.

27. Ñu răng kriê kơ phung hlăm sang ñu, leh anăn ñu amâo alah ôh.

28. Phung anak ñu kgŭ leh anăn hưn klei digơ̆ hdơr knga, wăt ung ñu msĕ mơh bi mni kơ ñu lač:

29. “Mâo lu phung mniê ngă jăk snăk năng mpŭ, ƀiădah ih êgao hĭn kơ jih jang diñu.”

30. Klei kƀăt jing klei mplư, leh anăn klei siam dưi luč; ƀiădah sa čô mniê thâo huĭ mpŭ kơ Yêhôwa srăng mâo klei bi mni.

31. Brei kơ ñu klei mưn năng kơ bruă kngan ñu ngă, leh anăn brei bruă ñu bi mni kơ ñu ti ƀăng jang ti anăp phung ƀuôn sang.