Adoh Bơni Hơơč - Đoạn 70
Bản dịch: Hră Ơi Adai Pơhiăp 2016
1. Rơkâo kơ Ih pơklaih kâo bĕ, Ơ Ơi Adai ăh! Ơ Yahweh ăh, rơkâo kơ Ih tañ djru kâo đa!
2. Brơi bĕ kơ ƀing hlơi pô hơduah kiăng mă pơđuaĭ hĭ tơlơi hơdip kâo mlâo mlañ hĭ laih anŭn rŭng răng. Brơi bĕ kơ ƀing hlơi pô khăp kiăng kơ kâo tơnap rŭng kơdŭn đuaĭ hĭ laih anŭn tŭ tơlơi pơmlâo.
3. Brơi bĕ kơ ƀing hlơi pô djik klao kơ kâo tui anai, “Hah ha, hah ha,” dŏ kơtuă tơngô bĕ yua mơ̆ng tơlơi mlâo mlañ tơdang ƀing gơñu thuơ hĭ hlo̱m ƀo̱m.
4. Brơi bĕ kơ abih bang hlơi pô hơduah sem Ih mơak mơai laih anŭn hơ̆k kơdơ̆k amăng Ih. Laih anŭn brơi bĕ kơ ƀing hlơi pô khăp kơ tơlơi pơklaih Ih laĭ bĕ nanao tui anai, “Ơi Adai jing prŏng prin biă mă!”
5. Bơ kơ kâo, kâo jing ƀun rin kơƀah kơƀap; rơkâo kơ Ih rai djru kâo tañ bĕ, Ơ Ơi Adai ăh. Ih jing Pô djru kâo laih anŭn Pô pơklaih kâo, Ơ Yahweh kâo hơi, anăm dŏ akaih hĭ dơ̆ng tah!