Adoh Bơni Hơơč - Đoạn 113

1. Bơni hơơč bĕ kơ Yahweh! Bơni hơơč bĕ, Ơ ƀing Israel jing ƀing ding kơna Yahweh hơi, bơni hơơč bĕ kơ anăn Yahweh!

2. Brơi bĕ kơ mơnuih mơnam bơni hiam kơ anăn Yahweh čơdơ̆ng mơ̆ng ră anai hlŏng truh pơ hlŏng lar.

3. Čơdơ̆ng mơ̆ng anih yang hrơi ƀlĕ hlŏng truh pơ anih yang hrơi lê̆, bơni hơơč bĕ kơ anăn Yahweh!

4. Yahweh git gai abih bang ƀing lŏn čar mơ̆ng adai adih; tơlơi ang yang Ñu prŏng hloh kơ adai rơngit anŭn yơh.

5. Hơmâo mơ̆ hlơi pô hrup hăng Yahweh Ơi Adai ta? Ñu yơh jing Pô dŏ ƀơi grê pơtao amăng anih glông hăng adai rơngit adih,

6. samơ̆ Ñu tơkui trŭn kiăng kơ lăng ƀơi khul tal adai laih anŭn ƀơi lŏn tơnah anai.

7. Yahweh yŏng đĭ ƀing mơnuih arăng kơtư̆ juă tơbiă mơ̆ng anih ƀruih lŏn, sĭt Ñu pŭ̱ đĭ ƀing mơnuih kơƀah kơƀap anŭn mơ̆ng ƀu̱r djăh tơnap tap yơh;

8. Ñu brơi ƀing gơ̆ jing gơyut hăng ƀing khua, jing hăng ƀing khua ba akŏ ƀing ană plei Yahweh kiăng kơ pơpŭ pơyom kơ ƀing gơ̆ yơh.

9. Ñu ăt pơpŭ mơ̆n kơ đah kơmơi plao amăng sang gơ̆; Ñu brơi kơ gơ̆ mơak mơai yuakơ Ñu pha brơi kơ gơ̆ ană bă yơh. Bơni hơơč kơ Yahweh!