Singx Nzung - Đoạn 99

1. Ziouv zoux hungh. Oix zuqc bun maanc fingx sin zinx. Ninh yiem wuov deix i dauh 〈ke^lu^mbim〉 mbu'ndongx nyei weic, bun ndau-beih zuqc ndanc dongz.

2. Ziouv yiem 〈Si^on〉 zoux hlo, ninh zungv zoux gauh hlo jiex maanc fingx.

3. Dauh dauh oix zuqc ceng meih hlo haic caux mbuoqc horngh nyei mbuox. Ninh se cing-nzengc.

4. Henv nyei Hungh Diex aah! Meih hnamv baengh fim nyei jauv yaac liepc gong-fim. Yiem I^saa^laa^en Mienh mbu'ndongx meih zoux horpc caux baengh fim nyei sic.

5. Ceng Ziouv, yie mbuo nyei Tin-Hungh. Yiem ninh lorngx zaux nyei dorngx baaix ninh. Ninh se cing-nzengc nyei.

6. Yiem ninh nyei sai mienh mbu'ndongx maaih Mose caux Aalon. Saa^mu^en yaac benx dauh jouh ninh nyei mbuox nyei mienh. Ninh mbuo heuc Ziouv, ninh yaac dau ninh mbuo.

7. Ninh yiem mbuonx-ndiouh gu'nyuoz caux ninh mbuo gorngv waac. Ninh mbuo ei jienv ninh gorngv nyei waac caux jiu bun ninh mbuo nyei leiz-nyeic.

8. O Ziouv, yie mbuo nyei Tin-Hungh aac, meih dau ninh mbuo. Meih se guangc ninh mbuo nyei zuiz nyei Tin-Hungh, mv baac ziux ninh mbuo zoux dorngc nyei jauv meih winh bun ninh mbuo.

9. Oix zuqc ceng Ziouv, yie mbuo nyei Tin-Hungh. Yiem ninh nyei cing-nzengc mbong zaangc ninh, weic zuqc Ziouv, yie mbuo nyei Tin-Hungh, se cing-nzengc nyei.