Singx Nzung - Đoạn 98

1. Oix zuqc baaux diuh siang-nzung ceng Ziouv weic zuqc ninh zoux mbuoqc horngh nyei sic. Ninh nyei mbiaauc jieqv buoz caux cing-nzengc qaqv bun ninh duqv hingh jiex.

2. Ziouv bun mienh hiuv duqv ninh hingh jiex ninh bun maanc fingx hiuv duqv ninh baengh fim nyei.

3. Ninh jangx taux ninh weic I^saa^laa^en Mienh maaih ziepc zuoqv nyei hnyouv yaac hnamv ninh mbuo. Gormx lungh ndiev duqv buatc mbuo nyei Tin-Hungh duqv hingh jiex.

4. Lungh ndiev mienh aah! Oix zuqc njien-youh nyei heuc jienv ceng Ziouv. Cuotv qiex njien-youh nyei baaux nzung ceng ninh.

5. Patv daanh baah baaux nzung ceng Ziouv, longc daanh baah patv puix nzung nyei sing-qiex.

6. Longc nzatc caux jorng nyei qiex, cuotv njien-youh nyei qiex mbui fungx bun Ziouv, mbuo nyei Hungh Diex.

7. Koiv caux yiem koiv nyei ga'naaiv, lungh ndiev caux yiem lungh ndiev nyei ga'naaiv oix zuqc cuotv qiex mbui.

8. Bun zuangx ndaaih mbaix ninh mbuo nyei buoz, zuangx mbong oix zuqc lomh nzoih njien-youh nyei baaux nzung

9. yiem Ziouv nyei nza'hmien, weic zuqc ninh oix daaih siemv lungh ndiev. Ninh oix baengh fim nyei siemv baamh gen, yaac longc gong-fim siemv maanc fingx.