Singx Nzung - Đoạn 84

1. O Nernh Jiex nyei Ziouv aac, yie hnamv haic meih yiem nyei dorngx.

2. Yie nyei hnyouv ndongc haaix oix yiem Ziouv nyei biauv, laatc gu'nyuoz, zungv haiz ngorc jienv yiem. Yie nyei sin caux hnyouv njien-youh nyei baaux nzung ceng ziangh jienv nyei Tin-Hungh.

3. O Nernh Jiex nyei Ziouv, yie nyei Hungh, yie nyei Tin-Hungh aac, yiem meih nyei ziec-dorngh ga'hlen, norqc meix lorz duqv dorngx yiem, mba'hinx yaac weic ganh lorz dorngx zoux lauz buoc dorn.

4. Yiem meih nyei biauv wuov deix mienh maaih orn-lorqc, zanc-zanc baaux nzung ceng meih. Selaa

5. Kaux meih duqv qaqv wuov deix, se liepc dingc hnyouv mingh Si^on Mbong nyei mienh, maaih orn-lorqc.

6. Ninh mbuo jiex Mbaakaa Horngz, naaiv norm horngz tiuv benx wuom-zingv nyei dorngx. Ciou gueix mbiungc yaac bun wuov norm dorngx, zaangh wuom buangv nzengc.

7. Mingh nyei ziangh hoc ninh mbuo gunv mingh gunv henv, dauh dauh ziouc mingh taux 〈Si^on,〉 yiem Tin-Hungh nyei nza'hmien.

8. O Nernh Jiex nyei Ziouv Tin-Hungh aah! Tov muangx yie daux gaux nyei waac. O Yaakopv nyei Tin-Hungh aah! Tov baeng m'normh muangx. Selaa

9. O Tin-Hungh aac, tov meih mangc yie mbuo nyei torngv-baaih, tov meih mangc meih longc youh orn daaih wuov dauh nyei hmien.

10. Yiem meih nyei biauv nyei laatc gu'nyuoz yietc hnoi se gauh longx yiem ganh norm dorngx yietc cin hnoi. Yie yiem yie nyei Tin-Hungh nyei biauv zuov gaengh se gauh longx yiem orqv mienh nyei biauv.

11. Ziouv Tin-Hungh se mba'hnoi caux torngv-baaih, ninh ceix en caux njang-laangc. Maiv maaih haaix nyungc longx nyei, Ziouv ngaengc jienv maiv ceix bun zoux horpc nyei mienh.

12. O Nernh Jiex nyei Ziouv aac, sienx kaux meih wuov deix maaih orn-lorqc.