Singx Nzung - Đoạn 46

1. Tin-Hungh zoux yie mbuo ndaauh kaux nyei dorngx yaac zoux yie mbuo nyei qaqv. Yie mbuo haaix zanc buangh zuqc kouv naanc ninh yaac tengx.

2. Weic naaiv, yie mbuo maiv gamh nziex maiv gunv lungh ndiev goiv yienc, mbong yaac dongz, ndortv njiec taux koiv-ndoqv,

3. maiv gunv wuom jiez laangc njunh njunh zoz-zoz nyei, zungv ndanc zuqc mbong dongz. Selaa

4. Maaih diuh ndaaih bun njiec nyei ndoqv liouc mingh bun Tin-Hungh nyei zingh a'hneiv. Naaiv norm zingh se Yiem Hlang Jiex Wuov Dauh nyei dinc.

5. Tin-Hungh yiem naaiv norm zingh gu'nyuoz, zingh ziouc maiv zuqc ndanc dongz, lungh ndorm yietv njang Tin-Hungh oix tengx naaiv norm zingh.

6. Maanc fingx mbiouh mbiouh nyei lunc nzengc, maanc guoqv dongz nzengc, Tin-Hungh heuc cuotv qiex, ndau-beih yuqc nzengc.

7. Nernh Jiex nyei Ziouv caux yie mbuo yiem. Yaakopv nyei Tin-Hungh zoux yie mbuo ndaauh kaux nyei dorngx. Selaa

8. Daaih maah! Daaih mangc Ziouv zoux nyei sic. Mangc gaax ninh hnangv haaix nor zoux bun ndau huaang nzengc.

9. Ninh bun mborqv jaax nyei jauv dingh taux jomc lungh ndiev, wuotv nauv juang-zinx, bun cang muonc nzengc, longc douz buov mborqv jaax cie.

10. Dingh njiec aqv, yaac hiuv duqv yie se Tin-Hungh. Yie yiem maanc fingx mbu'ndongx duqv mienh taaih. Yiem gormx lungh ndiev yie yaac duqv mienh taaih.

11. Nernh Jiex nyei Ziouv caux yie mbuo yiem. Yaakopv nyei Tin-Hungh zoux yie mbuo ndaauh kaux nyei dorngx. Selaa