Singx Nzung - Đoạn 3

1. O Ziouv aac, yie nyei win-wangv ndongc naaiv camv! Oix hoic yie wuov deix jaa camv jienv faaux.

2. Maaih mienh camv hnangv naaiv gorngv yie, “Tin-Hungh maiv tengx ninh aqv.” 〈Selaa〉

3. Mv baac Ziouv aac, meih zoux yie nyei torngv-baaih weih gormx yie. Meih zoux yie nyei njang-laangc, tengx yie cau duqv m'nqorngv jiez.

4. Yie heuc jienv tov Ziouv. Ninh yaac yiem ninh nyei cing-nzengc mbong dau yie. Selaa

5. Yie bueix njiec m'njormh mingh, yie aengx nyie daaih, weic zuqc Ziouv beu jienv yie.

6. Maiv gunv maaih waanc-waanc dauh win-wangv weih gormx yie, yie yaac maiv gamh nziex.

7. O Ziouv aah! Daaih maah! O yie nyei Tin-Hungh aah! Njoux yie maah! Weic zuqc meih mbaix yie nyei yietc zungv win-wangv nyei kamx-bui, mborqv orqv mienh nyei nyaah nauv.

8. Njoux en se yiem Ziouv daaih, tov ceix fuqv bun meih nyei baeqc fingx. Selaa