Singx Nzung - Đoạn 133

1. Mangc maah! Gorx-youz horpc fim dongh eix nyei yiem se za'gengh longx nyei, orn-lorqc haic.

2. Naaiv beiv jaaix haic nyei youh dox jienv 〈Aalon〉 nyei m'nqorngv aengx liouc njiec siaam, aengx liouc njiec taux ninh nyei lui-ndaauv nyei lui-jaang.

3. Se hnangv Hemon Mbong nyei mbiungc-suiv duih njiec 〈Si^on Mbong.〉 Weic zuqc yiem wuov maaih Ziouv ceix nyei fuqv, se yietc liuz ziangh nyei maengc.