Yopv - Đoạn 35

1. E^li^hu aengx gorngv,

2. “Meih hnamv daaih naaiv se baengh fim nyei fai? Meih gorngv, ‘Yie gauh baengh fim Tin-Hungh?’

3. meih cingx daaih naaic Tin-Hungh, ‘Yie duqv haaix nyungc longx? Yie maiv baamz zuiz yie duqv haaix nyungc gauh longx baamz zuiz wuov deix?’

4. “Yie oix dau meih yaac dau caux meih yiem nyei loz-gaeng doic.

5. “Cau hmien mangc wuov lungh! Mangc yiem meih gu'nguaaic hlang nyei mbuonx.

6. Se gorngv meih baamz zuiz, meih zoux haaix nyungc hoic Tin-Hungh? Se gorngv meih dorngc zuiz camv jienv faaux, meih nyei zuiz hnangv haaix nor zoux bun ninh?

7. Se gorngv meih zoux kuv mienh, meih jaa haaix nyungc bun ninh? Fai ninh yiem meih nyei buoz zipv haaix nyungc?

8. Meih zoux orqv sic kungx hoic baamh mienh hnangv meih nor. Meih zoux kuv mienh kungx tengx baamh mienh duqv longx.

9. “Mienh laaix zuqc zeix camv ziouc heuc, ninh mbuo tov tengx biaux ndutv henv wuov deix nyei buoz.

10. Mv baac maiv maaih haaix dauh gorngv, ‘Zeix yie daaih Wuov Dauh Tin-Hungh, se bun mienh lungh muonz zanc baaux nzung wuov dauh, yiem haaix?

11. Ninh njaaux yie mbuo gauh camv njaaux ndau-beih nyei hieh zoih, yaac bun yie mbuo maaih cong-mengh gauh camv yiem lungh nyei norqc.’

12. Ninh mbuo heuc jienv tov tengx mv baac Tin-Hungh maiv dau, weic zuqc orqv mienh maux haic.

13. Ninh mbuo baeqc baeqc heuc, Tin-Hungh zungv maiv muangx. Nernh Jiex Wuov Dauh maiv guen maiv sic nyei.

14. “Wuov nyungc, meih gorngv meih mangc maiv buatc Tin-Hungh, ninh ziouc gauh fatv maiv oix mangc meih. Meih yaac gorngv meih nyei sic yiem ninh nyei nza'hmien, meih yaac zuov jienv ninh.

15. Ih zanc meih hnamv daaih, maiv gunv Tin-Hungh qiex jiez, ninh maiv dingc zuiz, mienh baamz zuiz ninh maiv gunv aqv.

16. Weic naaiv Yopv gorngv jienv maiv lamh longc nyei waac mingh, gorngv waac camv yaac maiv hiuv ninh gorngv haaix nyungc.”