Yopv - Đoạn 30

1. “Mv baac gauh lunx yie wuov deix mienh jatv yie. Naaiv deix mienh nyei die yie buatc maiv zic duqv caux zuov yie nyei ba'gi yungh guanh nyei juv yiem.

2. Ninh mbuo nyei buoz nyei qaqv haih tengx haaix nyungc yie? Ninh mbuo nyei qaqv-leqc nzengc mi'aqv.

3. Laaix jomc kouv yaac ngorc, lungh muonz zanc yiem ndau-huaang ninh mbuo nyanc miev-nzungh nqaai.

4. Ninh mbuo gaeqv yiem deic-bung-huaang nyei ndiangx-normh, caux maiv maaih mueix nyei ndiangx-nzungh zoux nyanc hopv.

5. Ninh mbuo yiem mienh mbu'ndongx zuqc zunc cuotv, mienh heuc jienv zunc hnangv zunc janx-zaqc nor.

6. Ninh mbuo zuqc yiem ndoqv-zuonx nqaai yaac yiem ndau-kuotv caux mbaengx-ngaamh.

7. Ninh mbuo yiem ndau-huaang hnangv hieh zoih nor heuc, yaac mbengx jienv yiem ndiangx-dorn-fomv ga'ndiev.

8. Ninh mbuo benx yietc guanh maiv lamh longc nyei haac horngh mienh, zuqc biaav-bin mborqv zunc cuotv deic-bung.

9. “Ih zanc naaiv deix mienh dorh yie benx nzung baaux, yaac dorh yie benx gouv gorngv.

10. Ninh mbuo youx yie, simv yie go, yietv buatc yie ziouc tuiv wuom-nzuih naetv yie.

11. Weic zuqc Tin-Hungh bun yie mau, tengx maiv duqv ganh, ninh mbuo ziouc dorng jienv yie sueih eix zoux.

12. Naaiv deix ceux lunc nyei mienh yiem yie nyei mbiaauc maengx jiez daaih, ninh mbuo fongv yie cuotv mingh. Ninh mbuo liuc leiz jauv mietc yie.

13. Ninh mbuo bun yie biaux nyei jauv dangx, aengx jaa zeqc naanc bun yie, yaac maiv maaih haaix dauh dangv ninh mbuo.

14. Ninh mbuo ndutc ndutc nyei daaih hnangv bieqc zingh laatc tong nyei dorngx. Yiem baaic waaic nyei dorngx ninh mbuo wuz-wuz nyei daaih.

15. Gamh nziex haic nyei sic hoic yie kouv haic, yie nyei njang-laangc jiex hnangv nziaaux buonc mingh nor, yie nyei fuqv-loqc yaac hnangv mbuonx jiex mi'aqv.

16. “Ih zanc yie nyei hnyouv za'gengh kouv haic, zuqc kouv nyei hnoi-nyieqc zorqv jienv yie.

17. Lungh muonz zanc yie nyei mbungv hlam, nziuv-nziuv nyei mun yaac maiv maaih ziangh hoc dingh.

18. Tin-Hungh nyei domh qaqv dorngx hnangv yie nyei lui, aengx hnangv lui-jaang nor naeqc jienv yie.

19. Tin-Hungh zorqv yie zoi njiec wuom-bamc ndorngh, yie ziouc benx nie-mbung caux saaiv mi'aqv.

20. “Tin-Hungh aac, yie heuc jienv meih, meih yaac maiv dau yie, yie souv jiez daaih, meih kungx bungx m'zing mangc hnangv.

21. Meih tiuv hnyouv zoux doqc yie, longc meih henv haic nyei buoz zeix yie.

22. Meih bouh yie faaux yiem nziaaux gu'nguaaic, bun yie geh jienv nziaaux mingh, meih bun yie yiem domh nziaaux zuqc mbeu mingh mbeu daaih.

23. Yie hiuv duqv meih dorh yie mingh zuqc daic, se taux dingc ziangx dauh dauh ziangh jienv nyei mienh oix zuqc mingh nyei dorngx.

24. “Mv baac mienh yiem baaic waaic nyei ga'naaiv-ndui sung buoz, yaac yiem ninh zuqc nyei zeqc naanc heuc jienv tov tengx maiv zeiz?

25. Mienh ndortv naanc nyei ziangh hoc yie maiv zeiz weic ninh mbuo nyiemv fai? Yie nyei hnyouv maiv zeiz weic mienh jomc mienh nzauh fai?

26. Yie hnamv jienv oix duqv longx mv baac duqv ciouv. Yie zuov jienv njang mv baac hmuangx daaih taux.

27. Yie nyei hnyouv faan-fei lunc, maiv dingh yietc dangh, kouv naanc nyei hnoi-nyieqc morh jienv yie yiem.

28. Yie nzauh, hmien hmuangx yaac maiv maaih nyutc ziux, yie souv jienv gapv zunv nyei wuic, heuc jienv tov tengx.

29. Yie caux hieh juv benx muoz-doic, yaac caux norqc lorh torh zoux doic.

30. Yie nyei ndopv jieqv yaac nqorqv mi'aqv, yie nyei mbungv jorm hnangv douz buov nor.

31. Weic naaiv yie nyei daanh baah nyei qiex tiuv benx nzauh nyei qiex. Yie nyei hlauv-ndongh nux nyei qiex tiuv benx mienh nyiemv nyei qiex.