1 Zunh Doic Douh - Đoạn 27

1. Naaiv se I^saa^laa^en Mienh nyei mbuox ziux ninh mbuo nyei bungh buonc bieiv zeiv caux gunv yietc cin, gunv yietc baeqv dauh baeng nyei bieiv zeiv. Aengx maaih fu-sux hungh diex nyei jien, dongh liuc leiz mbenc hlaax jiex hlaax ziangh hnyangx tiuv bieqc cuotv nyei baeng-guanh nyei nyungc-nyungc sic. Guanh guanh baeng maaih i waanc biei cin dauh.

2. Da'yietv hlaax, da'yietv guanh maaih Sapc^ndi^en nyei dorn, Yaa^so^mbe^am, zoux bieiv zeiv. Ninh nyei guanh maaih i waanc biei cin dauh.

3. Ninh zoux Beletv nyei zeiv-fun, weic da'yietv hlaax zoux zuangx baeng-bieiv nyei domh bieiv zeiv.

4. Aa^hox^hai Mienh, Ndo^ndai, gunv da'nyeic hlaax nyei baeng-guanh. Mikv^lotv zoux ninh nyei guanh nyei bieiv zeiv. Ninh nyei guanh maaih i waanc biei cin dauh.

5. Da'faam hlaax, da'faam guanh nyei bieiv zeiv se Ye^ho^yaa^ndaa sai mienh nyei dorn, Mbe^nai^yaa. Ninh nyei guanh maaih i waanc biei cin dauh.

6. Mbe^nai^yaa se yietc dauh wuov deix “Faah Ziepc Dauh’ henv haic nyei jun-zeiv mienh, zungv gunv wuov deix “Faah Ziepc Dauh.” Ninh nyei dorn, Am^mi^saa^mbaatc, zoux ninh nyei guanh nyei bieiv zeiv.

7. Da'feix hlaax, da'feix guanh nyei bieiv zeiv se Yo^aapc nyei youz, Aa^saax^hen. Ninh nyei dorn, Se^mbaa^ndi^yaa, nzipc jienv ninh zoux. Ninh nyei guanh maaih i waanc biei cin dauh.

8. Da'hmz hlaax, da'hmz guanh nyei bieiv zeiv maaih I^saa^laa Mienh, Sam^hutc. Ninh nyei guanh maaih i waanc biei cin dauh.

9. Da'luoqc hlaax, da'luoqc guanh nyei bieiv zeiv maaih Te^ko^aa Mienh, Ikc^ketc nyei dorn, I^laa. Ninh nyei guanh maaih i waanc biei cin dauh.

10. Da'cietv hlaax, da'cietv guanh nyei bieiv zeiv maaih E^faa^im Fingx, Belon Mienh, He^letv^te. Ninh nyei guanh maaih i waanc biei cin dauh.

11. Da'betv hlaax, da'betv guanh nyei bieiv zeiv se Zelaa nyei bungh buonc, Husaa Mienh, Sipc^mbe^kai. Ninh nyei guanh maaih i waanc biei cin dauh.

12. Da'juov hlaax, da'juov guanh nyei bieiv zeiv maaih Mben^yaa^min Fingx, Aa^naa^totv Mienh, Aa^mbi^ye^se. Ninh nyei guanh maaih i waanc biei cin dauh.

13. Da'ziepc hlaax, da'ziepc guanh nyei bieiv zeiv maaih Zelaa nyei bungh buonc, Ne^to^faa Mienh, Maa^haa^lai. Ninh nyei guanh maaih i waanc biei cin dauh.

14. Ziepc yietv hlaax, ziepc yietv wuov guanh nyei bieiv zeiv maaih E^faa^im Fingx, Bi^laa^ton Mienh, Mbe^nai^yaa. Ninh nyei guanh maaih i waanc biei cin dauh.

15. Ziepc nyeic hlaax, ziepc nyeic wuov guanh nyei bieiv zeiv maaih Ne^to^faa Mienh, Otc^ni^en nyei bungh buonc, Hen^ndai. Ninh nyei guanh maaih i waanc biei cin dauh.

16. Liuc leiz fingx-fingx I^saa^laa^en Mienh nyei bieiv zeiv maaih hnangv naaiv. Lu^mben Fingx Sikc^li nyei dorn, E^li^ye^se; Si^me^on Fingx Maa^aa^kaa nyei dorn, Se^faa^ti^yaa.

17. Lewi Fingx Ke^mu^en nyei dorn, Haa^saa^bi^yaa; Aalon nyei zeiv-fun Saax^ndokc.

18. Yu^ndaa Fingx Se Ndaawitv nyei yietc dauh gorx, E^li^hu; Itc^saax^kaa Fingx Mi^kaa^en nyei dorn, Omli.

19. Se^mbu^lun Fingx O^mbaa^ndi nyei dorn, Itc^mai^aa; Napv^taa^li Fingx Atc^li^en nyei dorn, Ye^li^motv.

20. E^faa^im Fingx Aa^saa^si^yaa nyei dorn, Ho^se^yaa; Maa^natv^se ndaamv-fingx Be^ndaa^yaa nyei dorn, Yo^en.

21. Yiem Gi^le^aatc nyei Maa^natv^se nyei ndaamv-fingx Itc^ndo nyei dorn, Se^kaa^li^yaa; Mben^yaa^min Fingx Apc^ne nyei dorn, Yaa^aa^si^en.

22. Ndaan Fingx Ye^lo^ham nyei dorn, Aa^saa^len; Naaiv se fingx-fingx I^saa^laa^en Mienh nyei bieiv zeiv.

23. Ndaawitv maiv saauv nyic ziepc hnyangx ga'ndiev maengx nyei m'jangc dorn nyei soux mouc weic zuqc Ziouv laengz bun I^saa^laa^en Mienh ndongc lungh nyei hleix camv.

24. Se^lu^yaa nyei dorn, Yo^aapc, jiez gorn saauv mv baac saauv maiv ziangx. Laaix ninh saauv baeqc fingx, I^saa^laa^en Mienh zuqc Tin-Hungh nouz. Saauv nyei soux mouc maiv duqv fiev jienv Ndaawitv nyei hungh douh daan.

25. Aa^ndi^en nyei dorn, Atc^maa^wetv, goux hungh diex siou jaaix nyei ga'naaiv nyei dorngx. Utc^si^yaa nyei dorn, Yo^naa^taan, goux siou jaaix nyei ga'naaiv nyei dorngx yiem domh zingh ga'nyiec maengx nyei fiuv-mungv fiuv-laangz caux laauh.

26. Kelupv nyei dorn, E^saa^li, goux yietc zungv yiem lingh deic zoux gong nyei mienh.

27. Laamaa Mienh, Si^me^i, goux yietc zungv a'ngunc huingx. Sefaam Mienh, Sapc^ndi, goux siou yiem a'ngunc huingx cuotv daaih nyei a'ngunc diuv nyei dorngx.

28. Ge^nde Mienh, Mbaa^an Haanan, goux yiem fai bung nyei mbong-juoqv nyei ga'lanv caux ngongh nyorx biouv nyei ndiangx. Yo^aatc ziux goux siou ga'lanv youh nyei dorngx.

29. Saalon Mienh, Sitv^lai, goux yiem Saalon nyei miev-ciangv nyei ngongh guanh. Atc^lai nyei dorn, Saafatv, goux yiem horngz yungz nyei ngongh guanh.

30. I^saa^maa^en Mienh, O^mbin, goux lorh torh guanh. Me^lo^notv Mienh, Ye^ndaa^yaa, goux lorh guanh.

31. Haagaa Mienh, Yaasitv, goux ba'gi yungh guanh caux yungh guanh. Naaiv deix yietc zungv zoux liuc leiz Ndaawitv Hungh nyei jaa-dingh nyei mienh.

32. Ndaawitv nyei youz-diex, Yo^naa^taan, maaih cong-mengh zoux caangh laangh nyei mienh yaac zoux sou-biuv. Akv^mo^ni nyei dorn, Ye^hi^en, goux hungh dorn.

33. Aa^hi^to^fen yaac zoux hungh diex nyei caangh laangh mienh. Aanki Mienh, Husai, zoux hungh nyei doic.

34. Aa^hi^to^fen daic mingh, nqa'haav maaih Mbe^nai^yaa nyei dorn, Ye^ho^yaa^ndaa caux Aa^mbi^yaa^taa, nzipc jienv zoux caangh laangh mienh. Yo^aapc zoux hungh diex nyei jun-baeng nyei domh baeng-bieiv.