Phau Ntawv Nkauj - Đoạn 72

1. Vajtswv, thov koj qhia rau vajntxwv kom txiav txim raws li koj txojkev ncaj ncees; thov muab koj txojkev txiav txim ncaj ncees pub rau nws,

2. nws thiaj yuav muab txojkev txiav txim ncaj ncees los kav koj haivneeg thiab muab kev ncaj ncees los tswj cov uas raug kev tsimtxom.

3. Thov kom lub tebchaws muaj kev vammeej, thiab cia lub tebchaws tau txais kev ncaj ncees.

4. Thov kom vajntxwv txiav txim ncaj ncees rau cov pluag, thov kom nws pab cov txomnyem, thiab muab cov neeg uas tsimtxom lawv tsuj ntiag rau hauv av.

5. Thov kom koj haivneeg pehawm koj tsis paub kawg ib yam li lub hnub ci, thiab ib yam li lub hli pom kev, ib tiam dhau ib tiam mus li.

6. Thov kom vajntxwv zoo li cov nag uas los ywg tej liaj tej teb, thiab zoo li kob nag tshauv los ywg lub tebchaws.

7. Thov kom tej kev ncaj ncees muaj nyob rau nws tiam, thiab thov kom muaj kev vammeej mus tsis tu ib yam li lub hli ci pom kev.

8. Nws yuav kav sab hiavtxwv tim no mus txog ntua sab hiavtxwv tim ub, txij ntua ntawm tus dej Efalates mus txog ntua tim qab ntuj kawg.

9. Cov neeg uas nyob tom tiaj suabpuam yuav qhau cev hlo pehawm nws, nws cov yeebncuab yuav qhau hlo cev da rau hauv av.

10. Cov vajntxwv uas nyob tim tebchaws Xapees thiab hauv tej koog povtxwv yuav coj khoom tuaj rau nws; cov vajntxwv uas nyob nram tebchaws Senpas thiab tim tebchaws Xenpas yuav coj khoom tuaj pub rau nws.

11. Txhua tus vajntxwv yuav txhos caug pe nws; thiab txhua haivneeg yuav ua haujlwm rau nws.

12. Nws cawm cov neeg pluag uas thov txog nws, thiab cov neeg txomnyem uas tsis muaj leejtwg pab.

13. Nws hlub tshua cov uas qaug zog thiab cov pluag, nws cawm cov neeg txomnyem txojsia.

14. Nws cawm lawv dim ntawm cov neeg tsimtxom thiab cov neeg limhiam; nws saib lawv txojsia tseemceeb.

15. Thov kom vajntxwv muaj sia nyob txhiab niaj mus puas xyoo! Thov kom luag coj kub hauv tebchaws Senpas tuaj pub rau nws, thov kom luag thov Vajtswv pab nws tsis tseg tsis tu, thov Vajtswv foom koob hmoov rau nws mus li!

16. Thov kom lub tebchaws ntawd muaj nplej ntsu nplua mias, thov kom muaj qoobloo puv nkaus saum tej pov roob, thov kom muaj txiv ntoo ntau ib yam li pem tebchaws Lenpanoos. Thov kom muaj neeg nyob puv nkaus hauv tej nroog ib yam li nyom tuaj puv nkaus hauv tej nras liaj.

17. Vajntxwv lub npe yuav nyob mus ibtxhis, nws lub koob meej yuav nyob ntev ib yam li lub hnub. Cia txhua haivneeg thov Vajtswv foom koob hmoov rau lawv ib yam li nws tau foom koob hmoov rau vajntxwv.

18. Cia li qhuas tus TSWV uas yog cov Yixalayees tus Vajtswv! Nws tib leeg xwb thiaj ua tau tej txujci tseemceeb no.

19. Qhuas nws lub npe uas muaj tshwjchim mus ibtxhis li! Thov kom nws lub tshwjchim nyob puv nkaus hauv lub ntiajteb no.

20. Yexais tus tub Daviv tej lus thov Vajtswv xaus li no.