Phau Ntawv Nkauj - Đoạn 118

1. Cia li ua tus TSWV tsaug, rau qhov nws yog tus muaj lub siab zoo, thiab nws txojkev hlub nyob mus ibtxhis.

2. Thov kom ib tsoom Yixalayees hais tias, “Nws txojkev hlub nyob mus ibtxhis.”

3. Thov kom Vajtswv cov povthawj hais tias, “Nws txojkev hlub nyob mus ibtxhis.”

4. Thov kom txhua tus uas pehawm tus TSWV hais tias, “Nws txojkev hlub nyob mus ibtxhis.”

5. Thaum kuv ntxhov siab, kuv thov tus TSWV; nws teb kuv thiab tso kuv dim.

6. Tus TSWV nrog nraim kuv nyob, kuv yuav tsis ntshai li; leejtwg muaj peevxwm ua tau li cas rau kuv?

7. Twb yog tus TSWV tuaj kuv tog pab kuv, kuv yuav pom ntsoov kuv cov yeebncuab swb.

8. Cia siab rau tus TSWV zoo dua qhov uas tso siab rau neeg.

9. Cia siab rau tus TSWV zoo dua qhov uas tso siab rau tej nomtswv uas yog neeg.

10. Muaj yeebncuab coob nyob ibncig kuv; tiamsis vim tus TSWV lub hwjchim kuv yuav ua kom lawv puastsuaj!

11. Lawv nyob ibncig kuv txhua phab; tiamsis vim tus TSWV lub hwjchim kuv yuav ua kom lawv puastsuaj!

12. Lawv sau nthwv ib yam li tej ntab tuaj vij puagncig kuv, tiamsis lawv yuav kub hnyiab ib yam li hluavtaws kub tej hmab pos. Vim tus TSWV lub hwjchim kuv yuav ua kom lawv puastsuaj.

13. Luag tawmtsam kuv heev ua rau kuv yuav luag swb, tiamsis muaj tus TSWV pab kuv.

14. Tus TSWV ua rau kuv muaj cuabkav thiab muaj zog; nws yog tus cawm kuv dim.

15. Cia li mloog lub suab hu nkauj muaj yeej zoo siab uas nrov hauv Vajtswv haivneeg tej tsevntaub hais tias, “Yog tus TSWV lub hwjchim uas loj kawg nkaus tau ua tej ntawd!

16. Nws lub hwjchim uas loj kawg nkaus ua rau peb muaj yeej, nws lub zog loj nrog peb mus hauv tshavrog!”

17. Kuv yuav tsis tuag, tiamsis kuv yuav muaj sia nyob, thiab qhia tej uas tus TSWV tau ua lawm.

18. Nws rau txim hnyav heev rau kuv, tiamsis nws tsis cia kuv tuag.

19. Cia li qhib tej roojvag uas yog kev ncaj ncees rau kuv, kuv yuav mus rau hauv thiab ua tus TSWV tsaug!

20. Ntawm no yog tus TSWV lub roojvag; tsuas yog tus neeg ncaj ncees thiaj mus tau rau hauv xwb.

21. Tus TSWV, kuv ua koj tsaug rau qhov koj teb kuv tej lus thov, thiab koj pab kuv dim.

22. Lub pobzeb uas cov kws ua tsev muab povtseg, luag twb muab lub pobzeb ntawd rov los ua lub thawj lawm.

23. Qhov ntawd twb yog tus TSWV ua; tej ntawd ua rau peb xav tsis thoob li.

24. Hnub no yog ib hnub uas tus TSWV pub rau peb muaj yeej; peb cia li zoo siab thiab txaus siab rau hnub no!

25. Tus TSWV, thov cawm peb, thov cawm peb lauj! Tus TSWV, thov pab kom peb ua tau txhua yam tiav!

26. Thov Vajtswv foom koob hmoov rau tus uas Vajtswv txib los! Peb foom koob hmoov hauv tus TSWV lub Tuamtsev rau koj.

27. Tus TSWV yog Vajtswv; nws ua zoo kawg rau peb. Cia li nqa tej ceg ntoo mus ua kevcai ncig lub thaj.

28. Koj yog kuv tus Vajtswv, kuv ua koj tsaug; koj yog kuv tus Vajtswv, kuv yuav qhia koj lub hwjchim uas loj rau sawvdaws.

29. Cia li ua tus TSWV tsaug, rau qhov nws yog tus muaj lub siab zoo, thiab nws txojkev hlub nyob mus ibtxhis.