Phau Ntawv Nkauj - Đoạn 104

1. Kuv lub siab, cia li qhuas tus TSWV! Tus TSWV uas yog kuv tus Vajtswv, koj yog tus uas muaj hwjchim loj! Koj lub koob meej thiab lub tshwjchim ci ntsa iab puagncig koj;

2. koj muab qhov kaj qhwv koj. Koj muab lub ntuj nthuav ib yam li nthuav lub tsevntaub,

3. koj tsim koj lub tsev rau saum cov nplaim dej uas nyob saum qaum ntuj. Koj siv cov huab ua koj lub tsheb, thiab koj caij rawv saum tej cua.

4. Koj siv tej cua ua koj cov tub xa xov, thiab xoblaim uas cig liab vog ua koj cov tubtxib.

5. Koj muab lub ntiajteb txawb khov rau ntawm tej ncej uas txheem, lub ntiajteb yuav nyob qhov ntawd tsis txav chaw li.

6. Koj kom dej hiavtxwv vov nkaus lub ntiajteb ib yam li tej tsoos tsho qhwv nkaus neeg lub cev, thiab dej nyab puv nkaus saum tej hauv roob.

7. Thaum koj nthe nqho, dej txawm ntws; thaum dej hnov koj lub suab hais, dej cia li ntws laub lug lawm.

8. Tej dej ntawd ntws saum tej roob thiab tej hav txhua nrho los rau ntawm qhov chaw uas koj tsim cia rau tej dej ntawd.

9. Koj kem ciam tseg kom dej tsis muaj peevxwm ntws dhau tus ciam ntawd, kom tej dej ntawd thiaj tsis ntws los nyab lub ntiajteb no dua.

10. Koj tsim tej dej cag ntws raws tej kwjha thiab tej dej uas ntws raws tej kwjdeg.

11. Tej dej ntawd txhawv los rau tej tsiaj qus haus, thiab tej neesluav qus haus thaum tshaib nqis.

12. Tej nas noog los ua zes rau saum tej ntoo uas nyob ze rau ntawm ntug dej thiab quaj seev yees.

13. Koj tso nag saum ntuj los ywg tej roob, koj foom koob hmoov rau txhua qhov thoob plaws lub ntiajteb.

14. Koj tsim kom muaj tej nroj tsuag hlav mos nyoos rau tej tsiaj txhu noj, thiaj muaj qoobloo rau neeg cog kom neeg thiaj muaj noj muaj haus,

15. thiab muaj cawv txiv hmab los haus ua rau neeg zoo siab, kom muaj tej roj txiv ntoo ua rau neeg luag ntxhi, thiab muaj mov ua rau neeg muaj zog tuaj.

16. Tej ntoo ciab pem Lenpanoos, puavleej tau dej nag txaus, tej ntoo ntawd yeej yog tus TSWV li, nws yog tus cog cia.

17. Tej noog los ua zes rau saum tej ntoo ntawd, thiab os dej los ua zes rau ntawm tej ntoo thuv.

18. Tej sai nyob saum tej roob siab, thiab tej ntxim tsua nyob hauv tej qhov tsua.

19. Koj tsim muaj lub hli los quas hli thiab quas xyoo; lub hnub nws paub nws lub caij uas poob qho.

20. Koj tsim kom muaj hmo ntuj, thiab thaum tsaus ntuj tej tsiaj nruab nrag tawm tuaj nrhiav noj.

21. Tej thav tsov ntxhuav nyooj laws tawm mus nrhiav tej tsiaj uas Vajtswv pub rau lawv noj.

22. Thaum hnub tawm tuaj tej tsiaj ntawd txawm rov mus nkaum rau hauv tej qhov uas lawv txeev pw.

23. Ces tej neeg mam li tawm mus ua lawv tej haujlwm, thiab ua haujlwm tsis so mus txog thaum tsaus ntuj.

24. Tus TSWV, koj tsim ib puas tsav yam! Thaum peb saib tej uas koj tsim los ntawd ua rau peb pom hais tias koj yog tus muaj tswvyim! Lub ntiajteb puv nkaus txhua tsav yam uas koj tau tsim tseg.

25. Muaj hiavtxwv loj thiab dav heev, muaj tsiaj loj thiab tsiaj me suav tsis txheeb nyob hauv.

26. Muaj tej nkoj uas neeg tsav mus los hauv hiavtxwv, thiab muaj tus Zaj uas yog tus tsiaj nyaum uas koj tsim tseg nyob ua si khuav hauv hiavtxwv.

27. Tej tsiaj ntawd tos ntsoov koj pub rau lawv noj lawv haus thaum tshaib nqhis.

28. Thaum koj pub rau lawv noj, lawv thiaj tau noj, koj pub rau lawv muaj noj muaj haus, lawv thiaj tau noj tau haus tsau.

29. Thaum koj fee plhu tsis quav ntsej, lawv ntshai kawg li; thaum koj rho koj txoj pa mus lawm, ces lawv txawm tuag thiab rov mus ua av li qub.

30. Tiamsis thaum koj rau siav rau pa rau lawv, lawv ciaj sia tuaj, koj pub txojsia tshiab rau lub ntiajteb.

31. Thov kom tus TSWV lub tshwjchim uas ci ntsa iab nyob mus ibtxhis! Thov kom tus TSWV tsuas muaj zoo siab rau tej uas nws tsim lawm.

32. Tus TSWV tsa muag ntsia lub ntiajteb, lub ntiajteb ua zog koog; tus TSWV kov tej hauv roob, tej hauv roob txawm ncho pa auv niab tawm tuaj.

33. Kuv yuav hu nkauj qhuas tus TSWV tas kuv simneej; kuv yuav hu nkauj ua kuv tus Vajtswv tsaug mus txog hnub kuv tuag.

34. Thov kom kuv tej nkauj haum nws siab, rau qhov nws yog tus uas ua rau kuv zoo siab luag ntxhi.

35. Thov kom cov neeg ua txhaum raug puastsuaj tu noob nrho hauv ntiajteb no mus; thov tsis txhob tseg ib tug neeg siab phem nyob hlo li. Kuv lub siab, cia li qhuas tus TSWV! Cia li qhuas tus TSWV!