Yaxayas - Đoạn 61

1. Tus TSWV uas kav ib puas tsav yam tus ntsujplig los kav kuv lub siab, rau qhov tus TSWV tau xaiv kuv coj txojmoo zoo mus qhia rau cov neeg pluag, thiab mus nplig cov neeg uas muaj kev lwj siab, qhia txojkev dim rau cov neeg uas raug luag ntes, thiab qhia kev thajyeeb rau cov neeg raug txim.

2. Nws txib kuv mus qhia kom sawvdaws paub hais tias, twb txog lub sijhawm uas tus TSWV yuav cawm nws haivneeg, thiab nws ntaus yeej lawv cov yeebncuab lawm. Nws txib kuv mus nplig txhua tus uas muaj kev quaj ntsuag,

3. thiab muab kev zoo siab pauj kev quaj ntsuag rau cov neeg uas nyob hauv lub nroog Xi-oos, muab kev zoo siab thiab kev kaj siab pauj kev lwj siab, muab zaj nkauj uas hu qhuas tus TSWV pauj kev txomnyem nyuaj siab. Lawv yuav zoo ib yam li tsob ntoo uas tus TSWV cog tseg. Lawv yuav ua ncaj ua ncees mas sawvdaws yuav qhuas Vajtswv vim tej haujlwm zoo uas nws tau ua lawm.

4. Lawv yuav rov txhim kho tej qub nroog uas puastsuaj tas lawm, thiab rov kho tej chaw uas muab tso tseg tau ntau tiam dhau los lawm dua tshiab.

5. Cov neeg txawv tebchaws yuav yug nej tej tsiaj, laij nej tej teb thiab tu nej tej vaj txiv hmab;

6. luag yuav hu nej hais tias yog tus TSWV cov povthawj, thiab hu nej hais tias yog cov uas tuav Vajtswv tes haujlwm. Nej yuav tau txhua haivneeg tej nyiaj, thiab nej yuav khav ntxhias rau luag tej nyiaj uas nej tau los ntawd.

7. Nej txojkev txajmuag thiab kev poob ntsejmuag twb dhau lawm, nej yuav tau nyob hauv nej lub tebchaws. Nej yuav tau nyiaj thiab txhua tsav yam ib npaug ntxiv; thiab nej yuav zoo siab mus ibtxhis li.

8. Tus TSWV hais tias, “Vim kuv nyiam txojkev ncaj ncees, kuv ntxub txojkev ua tubsab thiab ua kev txhaum kawg li. Vim kuv yog tus uas ncaj ncees kuv yuav muab nqi zog rau kuv haivneeg, thiab kuv yuav coglus rau lawv mus ibtxhis li.

9. Kuv haivneeg yuav tau koob meej ntawm ibtsoom tebchaws; txhua tus uas pom lawv yuav paub hais tias, lawv yog haivneeg uas kuv foom koob hmoov rau lawm.”

10. Yeluxalees zoo siab heev rau tej uas tus TSWV tau ua lawm. Nws zoo li tus nkauj nyab thiab tus nraug vauv uas hnav tau cev tsoos mus rau hauv rooj tshoob. Vajtswv muab kev cawm dim thiab kev muaj yeej rau nws hnav.

11. Ib yam li tej noob qoob uas muab tseb lawm yeej yuav tuaj taus kaus, Tus TSWV uas kav ib puas yam tsav yuav cawm nws haivneeg. Thiab txhua haivneeg yuav qhuas tus TSWV.