Phau Ntawv Nkauj - Đoạn 22

1. Au kuv tus Vajtswv, kuv tus Vajtswv 'e, ua cas koj tso kuv tseg lawm? Ua cas koj nyob deb tsis pab kuv, tsis mloog tej lus uas kuv quaj ntsaj laws?

2. Au kuv tus Vajtswv, nruab hnub kuv quaj thov koj, koj kuj tsis teb, hmo ntuj kuv thov los tsis tau lub siab tus li.

3. Txawm li cas los koj yog tus dawb huv, koj ua vajntxwv nyob saum cov Yixayee lo lus qhuas.

4. Peb tej poj koob yawm txwv tso siab rau koj, lawv tso siab mas koj tso lawv dim.

5. Lawv quaj thov koj, lawv thiaj tau txais kev cawm dim, lawv tso siab rau koj, lawv thiaj tsis plam tej uas lawv vam.

6. Kuv yog ib tug kas xwb, tsis yog neeg, tej neeg ntxub kuv, ib tsoom pejxeem kuj saib tsis taus kuv.

7. Txhua tus uas pom kuv thuam luag kuv, zij ncaug co hau nto rau kuv hais tias,

8. “Nws muab nws tus kheej cob rau Yawmsaub, cia Yawmsaub pab nws dim los maj. Cia Yawmsaub cawm nws rau qhov Yawmsaub txaus siab rau nws.”

9. Txawm li ntawd, los koj yog tus uas coj kuv tawm hauv niam lub plab los, thiab pub kuv nyob tso siab plhuav rau hauv niam lub xubntiag.

10. Txij thaum yug los kuv yeej vam koj, koj yog kuv tus Vajtswv txij thaum kuv nyob hauv nruab thiab.

11. Thov koj tsis txhob nyob deb ntawm kuv, vim yog kev ceeblaj nyob ze kuv thiab tsis muaj leejtwg pab kiag li.

12. Muaj txiv nyuj coob vij kuv, yog cov txiv nyuj muaj zog hauv Npasas nyob puag ncig kuv.

13. Lawv rua ncauj loj rau kuv yam nkaus li tsov ntxhuav tom dua nyooj laws.

14. Kuv raug muab nchuav yam li dej, kuv tej pob txha huvsi kuj pluam tag. Kuv lub siab zoo li ciab ntab yaj tag rau hauv kuv hauv siab.

15. Kuv lub zog sem tag qhuav yam li tej txhais laujkaub av. Kuv tus nplaig lo rau ntawm txha puab tsaig lawm. Koj muab kuv tso rau hauv tej hmoov av uas yog txojkev tuag.

16. Yeej muaj dev vij vog kuv, ib pab neeg phem nyob vij kuv, lawv nkaug kuv xib teg thiab kuv xib taws.

17. Kuv suav tau kuv tej pob txha huvsi. Lawv saib ntsia ntsoov thiab hnyos luag kuv.

18. Lawv muab kuv tej ris tsho faib, kuv lub tsho lawv muab ua ntawv rho.

19. Au Yawmsaub, thov koj tsis txhob nyob deb, au koj uas pab kuv, thov maj nroos tuaj pab kuv lauj!

20. Thov cawm kuv tus ntsuj plig dim hniav ntaj, thiab cawm kuv txojsia dim ntawm tej dev lub zog.

21. Thov cawm kuv dim hauv tsov ntxhuav lub qhov ncauj, thiab cawm kuv dim ntawm cov txiv nyuj qus tej kub.

22. Kuv yuav hais txog koj lub npe rau kuv cov kwvtij paub. Kuv yuav qhuas koj rau thaum ib tsoom neeg tuaj txoos ua ke.

23. Nej cov uas paub ntshai Yawmsaub, cia li qhuas nws. Yakhauj caj ces sawvdaws, nej cia li ua rau nws tau koob meej. Yixayee caj ces sawvdaws, nej cia li hwm nws.

24. Rau qhov nws tsis tau saib tsis taus thiab ntxub cov uas txom nyem tej kev nyuaj siab. Nws tsis fee plhu ntawm lawv thiab thaum lawv quaj thov nws, nws kuj hnov.

25. Kuv tej lus qhuas koj rau thaum cov neeg coob coob tuaj txoos ua ke kuj yog koj pub. Kuv yuav pauj tej uas yeem lus lawd tab meeg cov uas paub ntshai koj.

26. Cov neeg raug txom nyem nyuaj siab yuav tau noj tsau npo. Cov uas nrhiav Yawmsaub yuav tau qhuas nws. Thov cia nej kaj siab lug mus ib txhis.

27. Thoob plaws hauv lub ntiajteb yuav nco ntsoov thiab tig los rau ntawm Yawmsaub, thiab txhua haiv neeg hauv ib tsoom tebchaws yuav pe hawm rau ntawm nws lub xubntiag.

28. Rau qhov Yawmsaub muaj hwjchim tswjhwm, thiab nws kav ib tsoom tebchaws.

29. Cov neeg khav theeb hauv lub ntiajteb sawvdaws yuav pe nws. Cov uas mus rau hauv qhov tuag sawvdaws yuav pe hawm nws, lawv yog cov uas tuav tsis tau txojsia nyob lawm.

30. Cov neeg uas yuav tshwm los yav tom qab yuav ua koom tu nws. Tej neeg yuav hais txog tus Tswv rau tiam neeg tom qab mloog,

31. thiab tshaj tawm nws txojkev cawm dim rau cov neeg uas tsis tau yug los paub tias nws ua nws tej haujlwm ntawd lawm.