Phau Ntawv Nkauj - Đoạn 129

1. Lawv twb tsim txom kuv heev thaum yau los, cia cov Yixayee hais li no,

2. lawv twb tsim txom kuv heev thaum yau los, tiamsis lawv kuj kov tsis yeej kuv.

3. Cov uas laij teb kuj laij sau kuv nrob qaum, lawv laij tej niag kab ntev ntev.

4. Yawmsaub yog tus ncaj ncees, nws muab cov neeg phem tej hlua uas khi kuv txiav pov tseg.

5. Thov kom cov uas ntxub Xi‑oo poob ntsej muag thiab tig rov qab.

6. Thov kom lawv zoo yam nkaus li tej nroj uas tuaj saum ruv tsev es qhuav tag tsis hlob.

7. Luag yuav tsis hlais tuav ntawm tes, luag yuav tsis pav ua ib tsuag rau ntawm ntiag.

8. Thiab cia cov uas dua kev tsis txhob hais tias, “Thov Yawmsaub foom koob hmoov rau nej. Peb tuav Yawmsaub lub npe foom koob hmoov rau nej.”