Phau Ntawv Nkauj - Đoạn 106

1. Cia li qhuas Yawmsaub. Cia li ua Yawmsaub tsaug, vim nws zoo kawg. Nws txojkev hlub ruaj khov nyob mus ib txhis.

2. Leejtwg yuav piav tag Yawmsaub tej haujlwm phimhwj thiab qhia nws tej haujlwm huvsi uas tsim nyog qhuas?

3. Cov uas tuav rawv kev txiav txim ncaj thiab ua ncaj ncees txhua lub sijhawm, kuj tau nyob kaj siab lug.

4. Au Yawmsaub, thaum koj hlub koj haiv neeg, thov nco txog kuv. Thaum koj tso lawv dim, thov pab kuv thiab,

5. kom kuv thiaj li pom cov neeg uas koj xaiv cia lawd kev vam meej, kom kuv thiaj tau nrog koj lub tebchaws zoo siab xyiv fab, thiab nrog cov uas yog koj qub txeeg qub teg khav tau.

6. Peb thiab peb tej poj koob yawm txwv tau ua txhaum muaj txim lawm, peb tau ua txhaum, peb tau ua phem.

7. Thaum peb tej poj koob yawm txwv nyob hauv Iyi tebchaws lawv tsis quav ntsej koj tej haujlwm phimhwj, lawv tsis nco txog koj txojkev hlub ruaj khov uas muaj nplua mias, lawv tseem fav xeeb rau tus Loj Dua Ntais ntawm hiavtxwv uas yog Hiavtxwv Liab.

8. Txawm li cas los nws tseem cawm lawv dim vim yog saib rau nws lub npe, kom nws thiaj qhia tau nws tus hwjchim uas loj kawg nkaus rau lawv paub.

9. Nws nthe nqho mas dej Hiavtxwv Liab cia li qhuav qhawv, nws coj lawv hla hauv qab thu yam nkaus li hla ntuj nrag teb do.

10. Nws thiaj cawm lawv dim hauv cov tshawj chim txhais tes, thiab tso lawv dim ntawm lawv cov yeeb ncuab txhais tes.

11. Dej nyab kiag cov uas tawm tsam lawv, tsis tshuav ib tug li.

12. Lub sijhawm ntawd lawv ntseeg Yawmsaub tej lus, lawv hu nkauj qhuas nws.

13. Tiamsis tsis ntev lawv kuj tsis nco qab nws tej haujlwm lawm, lawv tsis tos saib nws yuav taw qhia li cas.

14. Nyob hauv tebchaws moj sab qhua mas lawv nqhis heev, lawv thiaj sim Vajtswv hauv ntuj nrag teb do.

15. Nws pub raws li lawv thov tiamsis nws kuj tso mob phem los raug lawv.

16. Thaum cov neeg hauv lub zos khib Mauxe thiab Aloo uas yog Yawmsaub tus qhev dawb huv,

17. ces av cia li to qhov ntuj nqos kiag Dathas thiab txhub Anpilas pab neeg huvsi.

18. Hluavtaws kuj poob los rau saum lawv cov ntawd kub kiag cov neeg limhiam huvsi.

19. Cov Yixayee ua ib tug dab mlom thav nyuj ntawm Haule thiab pe tus dab mlom uas lawv nchuav ntawd.

20. Lawv muab Vajtswv lub hwjchim ci ntsa iab pauv tus dab mlom txiv nyuj uas yog tsiaj noj zaub.

21. Lawv tsis nco qab Vajtswv uas yog lawv tus cawmseej, uas tau ua tej haujlwm loj heev rau hauv Iyi tebchaws,

22. thiab ua tej haujlwm phimhwj hauv Has lub tebchaws thiab tej uas txaus ntshai kawg ntawm Hiavtxwv Liab.

23. Vim li no nws thiaj hais tias nws yuav muab lawv ua kom puam tsuaj, tsuas yog muaj Mauxe uas Vajtswv tau xaiv cia lawd sawv los tiv thaiv ntawm Vajtswv xubntiag thiaj li tav tau Vajtswv txojkev npau taws tsis ua kom puam tsuaj xwb.

24. Dhau ntawd lawv kuj saib tsis taus lub tebchaws uas zoo ua noj, lawv tsis ntseeg tej lus uas Vajtswv cog tseg.

25. Lawv yws tuj taws hauv lawv tej tsev ntaub, lawv tsis mloog Yawmsaub lub suab.

26. Vim li no Yawmsaub thiaj li tsa tes thiab cog lus twv rau lawv tias nws yuav ua rau lawv tuag tag rau hauv tebchaws moj sab qhua,

27. thiab ua rau lawv caj ces tawg ri ua sab ua sua mus rau hauv txhua haiv neeg, thiab ntiab lawv mus nyob thoob plaws txhua lub tebchaws.

28. Lawv kuj mus zwm rau tus dab Npa‑as ntawm Pe‑au, thiab noj tej uas muab xyeem rau tej dab mlom uas tsis muaj sia.

29. Tej uas lawv ua ntawd zes ua rau Yawmsaub chim heev, thiaj muaj mob phem tshwm los raug lawv.

30. Mas Fineha thiaj sawv tsees cheem, mas tej mob ntawd thiaj tsis muaj ntxiv lawm.

31. Tej uas nws ua ntawd Vajtswv suav tias yog kev ncaj ncees rau Fineha, ib tiam dhau ib tiam mus ib txhiab ib txhis.

32. Lawv ua rau Vajtswv chim ntawm dej Melinpa, mas qhov uas lawv ua li ntawd puas tsuas Mauxe,

33. vim yog lawv ua rau Mauxe nyuaj siab nws thiaj li ua ncauj sai lawm.

34. Lawv tsis muab lwm haiv neeg ua kom puam tsuaj raws li Vajtswv hais kom lawv ua

35. tiamsis lawv mus nrog lwm haiv neeg nyob sib xyaw thiab xyaum ua raws li luag ua.

36. Lawv ua koom tu luag tej dab mlom uas ua yej ua ntxiab cuab lawv.

37. Lawv tua lawv tej tub tej ntxhais xyeem rau dab.

38. Lawv muab cov uas tsis txhaum tej ntshav nchuav, yog lawv tej tub tej ntxhais li ntshav uas lawv muab tua xyeem rau Khana‑as tej dab mlom. Ntshav thiaj puas tsuas lub tebchaws qias tsis huv lawm.

39. Qhov uas lawv ua li ntawd ua rau lawv qias tsis huv, lawv ua li ntawd mas lawv zoo ib yam li poj muag cev.

40. Yawmsaub thiaj li npau taws rau nws haiv neeg, thiab ntxub nws qub txeeg qub teg.

41. Nws thiaj muab lawv rau hauv ib tsoom tebchaws txhais tes mas tej neeg uas ntxub lawv thiaj kav lawv.

42. Lawv cov yeeb ncuab quab yuam lawv thiab lawv poob rau hauv luag kev tswjhwm.

43. Yawmsaub tso lawv dim ntau zaus tiamsis lawv pheej txhob txwm fav xeeb, lawv poob qes kawg li vim yog lawv ua txhaum.

44. Txawm li cas los thaum Vajtswv hnov lawv lub suab quaj thov nws saib rau lawv tej kev txom nyem nyuaj siab.

45. Yog saib rau lawv, Vajtswv thiaj nco txog nws tej lus cog tseg, thiab vim nws txojkev hlub ruaj khov uas muaj nplua mias, nws thiaj rov khuvleej lawv.

46. Nws ua rau txhua tus uas ntes lawv cia li khuvleej lawv.

47. Au Yawmsaub uas yog peb tus Vajtswv, thov koj cawm peb dim lauj, thov qaws peb hauv txhua lub tebchaws rov los es peb yuav ua tsaug koj lub npe uas dawb huv thiab khav qhov uas peb qhuas koj.

48. Cia li qhuas Yawmsaub uas yog Yixayee tus Vajtswv ib txwm thaum ub los mus ib txhis li. Cia ib tsoom neeg hais tias “Amee.” Cia li qhuas Yawmsaub.