Khiavdim - Đoạn 8

1. Yawmsaub has rua Mauxe tas, “Ca le nkaag moog cuag Falau hab has rua nwg tas, ‘Yawmsaub has le nuav tas, Ca le tso kuv haiv tuabneeg moog sub puab txhad tau moog pe hawm kuv.

2. Tassws yog koj tsw kaam tso puab moog, kuv yuav tso qaav nce thoob plawg koj lub tebchaws ua rua koj raug txom nyem.

3. Qaav yuav puv nkaus tug dej Nai, hab yuav nce lug rua huv koj lub vaaj lub tsev, lug rua huv koj lub txaaj hab nce rua sau koj lub chaw pw, hab lug rua huv koj cov tub teg tub taw hab koj cov pejxeem tej tsev, hab lug rua huv koj tej qhov cub qhov txus hab lug rua huv koj tej phaaj zuaj ncuav.

4. Tej qaav yuav nce koj hab koj cov pejxeem hab koj cov tub teg tub taw lub cev huvsw.’ ”

5. Yawmsaub has rua Mauxe tas, “Koj ca le has rua Aloo tas, ‘Tsaa koj txhais teg kws tuav tug paas nreg rua sau tej nam dej tej kwj deg tej paag dej ua kuas tej qaav nce lug rua sau Iyi tebchaws.’ ”

6. Aloo txawm tsaa hlo teg rua sau tej dej huv Iyi tebchaws, mas qaav txawm nce lug laum nkaus Iyi tebchaws.

7. Tassws cov kws txawj ua yeeg swv mas puab swv puab tej khawv koob ua kuas qaav nce lug rua sau Iyi tebchaws ib yaam nkaus hab.

8. Falau txawm hu Mauxe hab Aloo tuaj hab has tas, “Meb thov Yawmsaub coj tej qaav nuav tawm ntawm kuv hab kuv cov pejxeem moog, mas kuv yuav tso meb cov tuabneeg moog xyeem tsaj rua Yawmsaub.”

9. Mauxe txhad has rua Falau tas, “Nyob ntawm koj pum zoo teem rua lub swjhawm twg rua kuv thov Yawmsaub paab koj hab koj cov tub teg tub taw hab koj cov pejxeem kuas tej qaav nuav puam tsuaj taag ntawm koj hab koj tej vaaj tse, tsuas yog tseg cov kws nyob huv tug dej Nai xwb.”

10. Falau teb tas, “Ca pigkig.” Mauxe txhad has tas, “Yuav muaj lawv le koj has mas koj txhad paub tas tsw muaj ib tug twg zoo cuag le Yawmsaub kws yog peb tug Vaajtswv.

11. Tej qaav yuav tswv ntawm koj hab koj tej vaaj tse hab koj cov tub teg tub taw hab koj cov pejxeem moog, tsuas yog tseg cov kws nyob huv tug dej Nai xwb.”

12. Mauxe hab Aloo txhad tawm ntawm Falau moog lawm. Mas Mauxe thov Yawmsaub txug tej qaav kws Yawmsaub tso lug rua Falau.

13. Yawmsaub ua lawv le Mauxe thov. Mas tej qaav txhad tuag taag rua huv tej vaaj tse hab tej tshaav puam hab tom tej laj teb.

14. Puab khaws tej qaav tuag hov ua tej nam pawg, mas lub tebchaws tsw lwj quas lawg.

15. Tassws thaus Falau pum tas tej kev txom nyem hov pluj lawm, nwg txawm ua lub sab tawv tsw kaam noog Mauxe hab Aloo has, ib yaam le Yawmsaub tub has ca lawd.

16. Yawmsaub has rua Mauxe tas, “Ca le has rua Aloo tas, ‘Tsaa hlo koj tug paas nreg nplawm moov aav kuas txa ua yoov qab thoob plawg Iyi tebchaws.’ ”

17. Ob tug kuj ua le ntawd. Aloo tsaa hlo nwg txhais teg xuas nwg tug paas nreg nplawm moov aav, tes txawm muaj yoov qab lug ntsauv tuabneeg hab tej tsaj txhu. Tej moov aav huvsw txa ua yoov qab thoob plawg Iyi tebchaws.

18. Cov kws txawj ua yeeg swv kuj swv puab tej khawv koob ua kuas muaj yoov qab tassws puab ua tsw tau. Yoov qab lug ntsauv tuabneeg hab tej tsaj txhu huvsw.

19. Cov kws txawj ua yeeg swv txhad has rua Falau tas, “Tej nuav yog Vaajtswv tug ntiv teg ua.” Tassws Falau lub sab tseed tawv tsw noog puab has, ib yaam le Yawmsaub tub has ca lawd.

20. Yawmsaub has rua Mauxe tas, “Ca le sawv ntxuv moog tog Falau rua thaus nwg moog nraag ntug dej mas has rua nwg tas, ‘Yawmsaub has le nuav tas, Ca le tso kuv haiv tuabneeg moog sub puab txhad tau moog pe hawm kuv.

21. Yog koj tsw tso kuv haiv tuabneeg moog, mas kuv yuav tso tej paab yoov ntsuab lug ntsauv koj hab koj cov tub teg tub taw hab koj cov pejxeem, hab lug rua huv koj tej vaaj tse. Huv cov Iyi tej vaaj tse hab huv tej aav kws puab nyob yuav muaj tej paab yoov ntsuab puv nkaus.

22. Nub ntawd kuv yuav cais Kausee tebchaws kws kuv haiv tuabneeg nyob rua ib caag, tsw pub muaj tej paab yoov ntsuab rua huv, sub koj txhad paub tas kuv yog Yawmsaub kws nyob huv plawv lub tebchaws nuav.

23. Kuv yuav cais kuv haiv tuabneeg hab koj cov tuabneeg. Qhov txujci phemfwj nuav yuav tshwm rua pigkig.’ ”

24. Yawmsaub kuj ua lawv le ntawd. Tes txawm muaj yoov ntsuab coob kawg lug rua huv Falau lub vaaj tse hab lug rua huv nwg cov tub teg tub taw tej vaaj tse ua rua muaj kev lamswm thoob plawg Iyi tebchaws.

25. Falau txawm hu Mauxe hab Aloo tuaj hab has tas, “Ca le moog tua tsaj xyeem rua meb tug Vaajtswv rua huv lub tebchaws nuav.”

26. Tassws Mauxe teb tas, “Ua tsw tau le ntawd, tsua qhov peb yuav muab tej tsaj kws cov Iyi caiv tua xyeem rua Yawmsaub kws yog peb tug Vaajtswv. Yog peb tua tej tsaj xyeem taab meeg cov Iyi kws puab caiv tas yog yaam kws qas vuab tsuab, puab yuav tsw xuas pob zeb ntaus peb lov?

27. Peb yuav tsum moog rua huv tebchaws moj saab qhua peb nub ke tua tsaj xyeem rua Yawmsaub kws yog peb tug Vaajtswv lawv le nwg has rua peb.”

28. Falau txhad has tas, “Kuv yuav tso mej moog sub mej txhad tau moog xyeem tsaj rua Yawmsaub kws yog mej tug Vaajtswv huv tebchaws moj saab qhua, tassws tsw xob moog deb deb. Koj ca le thov Vaajtswv paab kuv.”

29. Mauxe txhad has tas, “Thaus kuv tawm ntawm koj moog lawd kuv yuav thov Yawmsaub ua rua tej yoov ntsuab tswv ntawm koj hab ntawm koj cov tub teg tub taw hab ntawm koj cov pejxeem moog rua pigkig. Tassws koj tsw xob ntxeev dua lug es tsw tso peb haiv tuabneeg moog xyeem tsaj rua Yawmsaub.”

30. Mauxe txawm tawm ntawm Falau moog lawm, nwg kuj thov Yawmsaub.

31. Yawmsaub ua lawv le Mauxe tej lug thov txhad ua rua tej yoov ntsuab tswv ntawm Falau hab ntawm nwg cov tub teg tub taw hab ntawm nwg cov pejxeem moog, tsw tshuav ib tug le.

32. Tassws zag nuav Falau tseed ua lub sab tawv hab, tsw kaam tso cov Yixayee moog.