Tej Lus Qhia - Đoạn 7

1. Lub koob meej zoo mas zoo dua tej roj tsw qaab kws muaj nqes. Nub kws tuag zoo dua nub kws yug.

2. Moog rua huv lub tsev kws quaj ntsuag zoo dua moog rua huv lub tsev noj nqaj noj qhau, vem tas qhov nuav yog qhov kawg rua tuabneeg txhua tug huvsw, mas cov kws tseed ua neej nyob yuav khaws tej nuav rua huv lub sab.

3. Nyob mluag quas mlob zoo dua le luag luag, vem tas lub ntsej muag mluag mlob ua rua lub sab xyiv faab.

4. Tug kws muaj tswvyim lub sab yeej nyob huv lub tsev kws quaj ntsuag, tug kws tsw thoob tswb lub sab yeej nyob huv lub tsev kws ua lomzem.

5. Noog tug muaj tswvyim lu lug qhuab ntuag zoo dua noog tug ruag hu nkauj.

6. Hlawv xuav paug tawg huv qaab laujkaub le caag, tug ruag lub suab luag kuj ib yaam le ntawd. Nuav kuj yog qhuav qhawv xwb.

7. Kev quab yuam tswm txom ua rua tug kws muaj tswvyim ruag lawm. Tej nyaj xab ua rua lub sab ntxeev phem taag lawm.

8. Qhov kws xaus zoo dua le qhov kws chiv. Ua lub sab ntev zoo dua le lub sab khaav theeb.

9. Tsw xob chim sai, tsuas yog tug tsw thoob tswb txhad khaws qhov chim rua huv lub sab moog le.

10. Tsw xob nug tas, “Ua caag yaav thau u zoo dua le nwgnuav?” Qhov kws nug le ntawd yog tsw muaj tswvyim txhad nug.

11. Tswvyim zoo yaam nkaus le tej qub txeeg qub teg hab muaj qaabhau rua tug kws pum lub nub.

12. Tswvyim tiv thaiv tau ib yaam le nyaj txag tiv thaiv. Kev txawj ntse tug nqe yog qhov kws tswvyim tuav tau tug kws txawj ntse txujsa.

13. Ca le tshuaj saib Vaajtswv teg num. Yaam kws Vaajtswv ua nkhaus lawd leejtwg yuav muab yeb kuas yag tau?

14. Thaus muaj kev vaam meej ca le zoo sab xyiv faab, thaus muaj kev txom nyem, ca le ua tuab zoo xaav. Ob yaam nuav puavleej yog Vaajtswv ua, tuabneeg txhad tsw txawj paub tas yuav muaj daabtsw tshwm lug rua yaav tom qaab kws dua puab.

15. Thaus kuv ua neej nyob qhuav qhawv kuv tau pum txhua yaam. Muaj cov ncaaj nceeg, txawm yog nwg ua ncaaj nceeg los nwg tseed tuag, hab muaj cov tuabneeg phem, txawm yog nwg ua phem los nwg tsua muaj txujsa nyob ntev.

16. Tsw xob ua tuabneeg ncaaj dhau, hab tsw xob ua tug ntse dhau. Ua caag koj yuav ua rua koj puam tsuaj?

17. Tsw xob ua phem ntau dhau, hab tsw xob ua tuabneeg ruag. Ua caag koj yuav tuag ua ntej kws tsw tau txug koj caij?

18. Qhov kws zoo yog qhov kws koj tuav rawv yaam nuav ca, hab tsw xob nkaum teg kuas nplaam yaam tod. Tug kws fwm hab paub ntshai Vaajtswv yuav zaam dhau txhua yaam ntawd.

19. Tswvyim pub zug rua tug kws txawj ntse ntau dua le kaum leej kws kaav lub nroog.

20. Yeej tsw muaj ib tug ncaaj nceeg huv lub nplajteb kws ua qhov zoo xwb xwb le tsw ua txhum hlo le.

21. Tsw xob quav ntsej noog txhua lu lug kws luas has, tsaam tes koj tsua tau nov koj tug tub qhe foom tshev koj,

22. tsua qhov koj lub sab yeej paub tas muaj ntau zag koj tau foom tshev lwm tug ib yaam nkaus.

23. Kuv tub swv kuv tug tswvyim swm tej nuav lawm. Kuv has tas, “Kuv yuav tau tswvyim,” tassws tswvyim nyob deb kuv.

24. Tej kws muaj lawm kuj nyob deb heev, tej kws tub kuj nyob tub dhau. Leejtwg yuav tshawb tau tawm lug?

25. Kuv txhad tig kuv lub sab lug kawm paub hab tshawb nrhav tswvyim hab txhua yaam lub keeb, hab kawm paub tas txujkev ua phem yog txujkev tsw thoob tswb hab txujkev tsw thoob tswb yog txujkev ruag.

26. Kuv ntswb dua ib yaam kws ab sab heev dhau txujkev tuag, yog tug quaspuj kws lub sab zoo le lub qhov taub hab rooj hlua cuab, nwg txhais teg yog txuj saw hlau. Tug kws ua hum Vaajtswv lub sab txhad dim ntawm tug puj hov, tassws tug kws ua txhum muaj txem yuav raug nwg nteg.

27. Tub laaj lim has tas, “Saib maj, kuv ntswb zoo le nuav, yog kuv muab ib zaaj lug txuas rua ib zaaj sub txhad nrhav tau lub keeb,

28. yog yaam kws kuv lub sab nrhav taag los nrhav thab tassws kuv nrhav tsw tau. Ib txheeb tuabneeg tsuas nrhav tau ib tug txwvneej zoo xwb, tassws tub nrhav tsw tau ib tug quaspuj zoo.

29. Saib maj, kuv tsuas ntswb yaam nuav xwb, yog qhov kws Vaajtswv tswm tuabneeg kuas ua ncaaj nceeg, tassws puab nrhav kev ua phem xwb.”