Tej Lus Qhia - Đoạn 10

1. Yoov tuag ua rua tej roj tsw qaab tsw ntxhab lawm, txujkev ruag mivntswv xwb nyaav dua tug tswvyim hab lub koob meej.

2. Tug kws muaj tswvyim lub sab coj nwg moog rua saab xws, tassws tug ruag lub sab coj nwg moog rua saab txhum phem.

3. Thaus tug tuabneeg ruag taug kev, nwg yeej tsw paub qaabhau, nwg tug cujpwm ua rua suavdawg pum tas nwg yog tug ruag.

4. Yog tug thawj npau tawg rua koj, koj tsw xob tawm ntawm koj lub chaw moog, vem qhov kws ua sab ntev yuav ua rua nwg zaam txem tau.

5. Muaj ib yaam phem kws kuv pum huv qaab lub nub, yog tej kev txhum kws tug thawj ua.

6. Tsaa tug ruag nyob lub rooj sab, qhau tug nplua nuj nyob lub rooj qeg.

7. Kuv pum tej qhev caij neeg, hab pum tej thawj moog kwtaw yaam le tej qhev.

8. Leejtwg khawb qhov ca, nwg yuav poob rua huv qhov ntawd, leejtwg tho phaab ntsaa nkaag rua huv, naab yuav tum nwg.

9. Leejtwg txaam pob zeb, pob zeb yuav raug tug hov mob, leejtwg phua ntoo, ntoo yuav ua rua nwg raug ceblaaj.

10. Yog taus npub lawm, tsw muab huv kuas ntse, yug yuav tsum swv zug heev dua, tassws tswvyim yuav paab ua tau kuas tav.

11. Yog naab tum ua ntej kws tsw tau muab cob kuas seej, tug kws cob naab tsw muaj qaabhau daabtsw.

12. Tug kws muaj tswvyim lub qhov ncauj tej lug ua kuas nwg tau koob moov, tug kws ruag tug nplaig yuav rov ua rua nwg puam tsuaj.

13. Nwg chiv has tej lug tsw thoob tswb tawm huv lub qhov ncauj lug, mas thaus kawg yuav has tej lug kws ruag phem kawg le.

14. Tug ruag ncauj ntau has tsw txawj taag le. Tuabneeg tsw paub tas yuav tshwm xwm daabtsw lug. Leejtwg yuav has tau tas thaus dua nwg lawm yuav muaj daabtsw tshwm lug?

15. Tug ruag tej num ua rua nwg txug sav, nwg tsw paub txujkev kws nkaag moog rua huv lub nroog.

16. Lub tebchaws 'e, koj yuav raug txom nyem rua thaus koj tug vaajntxwv yog mivnyuas yau, hab koj cov thawj paam noj paam haus ua lomzem rua thaus taagkig.

17. Lub tebchaws 'e, koj yuav tau moov zoo rua thaus koj tug vaajntxwv yog keeb vaaj, hab koj cov thawj noj haus lawv swjhawm sub txhad muaj zug tsw yog qaug dej qaug cawv.

18. Vem yog cis nkeeg ruv tsev txhad luv pob taag, hab vem yog cis nkeeg puag teg puag taw, lub tsev txhad xaw quas ntsuav.

19. Zaub mov ua rua muaj kev lomzem zoo sab, cawv txwv maab ua rua lub neej xyiv faab, nyaj txag ua rua muaj txhua yaam.

20. Tsw xob tshev foom vaajntxwv, txawm yog huv koj lub sab los tsw xob tshev, hab tsw xob tshev foom cov nplua nuj huv koj lub txaaj pw, tsaam tes ib tug noog sau nruab ntug tsua coj koj tej lug moog, lossws tug kws muaj kauj tis yuav pav koj zaaj.