Phau Ntawv Nkauj - Đoạn 98

1. Ca le hu zaaj nkauj tshab rua Yawmsaub, tsua qhov nwg tau ua tej kws phemfwj kawg. Nwg tau swv nwg txhais teg xws hab nwg txhais npaab kws dawb huv kov yeej.

2. Yawmsaub qha nwg txujkev kov yeej rua suavdawg paub, hab ua nwg txujkev cawm dim tshwm taab meeg ib tsoom tebchaws pum.

3. Nwg ncu txug nwg txujkev hlub kws ruaj khov hab nwg txujkev ncaaj kws tso sab tau kws nwg ua tshwm rua cov Yixayee. Thoob qaab ntuj kawg puavleej tau pum peb tug Vaajtswv txujkev kov yeej.

4. Thoob lub nplajteb 'e, ca le tsaa suab xyiv faab rua Yawmsaub, ca le tsaa suab hu nkauj xyiv faab hab qhuas nwg.

5. Ca le ntaus nkauj nog ncaas hu nkauj qhuas Yawmsaub, ca le ntaus nkauj nog ncaas hab seev suab.

6. Ca le tshuab xyu tshuab raaj kub yaaj ua lub suab xyiv faab rua ntawm Yawmsaub kws yog vaajntxwv xubndag.

7. Ca dej havtxwv hab txhua yaam kws nyob puv nkaus huv qw suab nrov ntshu quas nrooj, ca lub nplajteb hab txhua yaam kws nyob huv qw.

8. Ca tej nam dej npuaj teg, ca tej pov roob hu nkauj ua ke xyiv faab,

9. rua ntawm Yawmsaub xubndag, tsua qhov nwg lug txav txem rua lub nplajteb. Nwg yuav txav txem ncaaj nceeg rua lub nplajteb hab txav txem ncaaj rua ib tsoom tuabneeg.