Phau Ntawv Nkauj - Đoạn 97

1. Yawmsaub ua vaajntxwv kaav. Ca nplajteb xyiv faab, ca tej tebchaws kws coob kawg ntawm ntug havtxwv zoo sab.

2. Muaj fuab hab muaj qhov tsaus ntuj nti nyob vej nwg, txujkev ncaaj nceeg hab qhov kws txav txem ncaaj yog lub taw tag nwg lub zwm txwv.

3. Muaj suavtawg cig ua nwg ntej hab hlawv nwg tej yeeb ncuab kws nyob ib ncig.

4. Nwg tej tsag lig xub ci nplaag thoob qaab ntuj, lub nplajteb pum hab tseeg quas nkawg.

5. Tej roob yaaj pes ntsuav le cab ntaab rua ntawm Yawmsaub xubndag, rua ntawm tug Tswv kws kaav taag nrho lub nplajteb lub xubndag.

6. Lub ntuj tshaaj tawm nwg txujkev ncaaj nceeg hab ib tsoom tuabneeg suavdawg pum nwg tug fwjchim ci ntsaa quas ab.

7. Txhua tug kws pe txoov daab raug txaaj muag, yog cov kws khaav txug puab tej daab kws tsw muaj qaabhau. Tej timtswv huvsw pe ntawm nwg xubndag.

8. Xi‑oo tau nov mas zoo sab, hab Yuta tej ntxhais xyiv faab, vem yog Vaajtswv koj lug txav txem.

9. Au Yawmsaub, koj yog tug Luj Dua Ndais sau lub nplajteb huvsw, koj sab dhau tej timtswv huvsw ntau npaug.

10. Yawmsaub hlub cov kws ntxub kev phem, nwg tsom kwm nwg cov tuabneeg dawb huv txujsa, nwg cawm puab dim huv cov tuabneeg limham txhais teg.

11. Txujkev kaaj ci rua cov tuabneeg ncaaj nceeg, hab txujkev xyiv faab muaj rua cov tuabneeg sab ncaaj.

12. Mej cov kws ncaaj nceeg, ca le zoo sab rua huv Yawmsaub, hab ua tsaug nwg lub npe kws dawb huv.