Phau Ntawv Nkauj - Đoạn 9

1. Kuv yuav ua Yawmsaub tsaug kawg kuv lub sab, kuv yuav has txug koj tej daag num phemfwj huvsw.

2. Kuv yuav zoo sab hab xyiv faab rua huv koj. Au Vaajtswv kws Luj Dua Ndais, kuv yuav hu nkauj qhuas koj lub npe.

3. Thaus kuv cov yeeb ncuab thim rov qaab, puab dawm hab puam tsuaj taab meeg ntawm koj xubndag,

4. tsua qhov koj tuav kuv txujcai kws ncaaj, koj nyob sau lub zwm txwv txav txem ncaaj nceeg.

5. Koj tub tshev ib tsoom tebchaws, koj tub muab cov tuabneeg limham ua kuas puam tsuaj, koj tub muab puab tej npe thuam tseg ib txhws tsw kawg.

6. Tej yeeb ncuab puam tsuaj pluj taag moog ib txhws le, puab tej moos koj muab dob hlo pov tseg, hab tsw muaj leejtwg ncu txug puab le lawm.

7. Yawmsaub nyob sau lub zwm txwv kaav moog ib txhws le, nwg tau tsaa nwg lub zwm txwv lug txav txem.

8. Nwg txav txem ncaaj nceeg rua lub nplajteb, nwg txav txem ncaaj rua ib tsoom tuabneeg.

9. Yawmsaub yog lub chaw ruaj khov rua cov tuabneeg kws raug quab yuam, yog lub chaw ruaj khov rua lub swjhawm kws raug ceblaaj.

10. Au Yawmsaub, cov kws paub koj lub npe kuj tso sab rua koj, vem koj tsw tso cov tuabneeg kws nrhav koj pov tseg le.

11. Ca le hu nkauj qhuas Yawmsaub kws nyob huv Xi‑oo, ca le pav txug nwg tej num rua huv ib tsoom tuabneeg.

12. Nwg yog tug tsob caub hab ncu txug puab, nwg tsw nov qaab tug kws raug txom nyem nyuaj sab lub suab hu.

13. Au Yawmsaub, thov koj hlub kuv. Thov tsaa qhov muag saib cov kws ntxub kuv tswm txom kuv le caag. Koj tsaa kuv sawv ntawm lub qhov rooj kev tuag rov lug,

14. sub kuv txhad pav txug txhua yaam kws tswm nyog qhuas koj, hab kuv txhad zoo sab xyiv faab rua koj txujkev cawm dim rua ntawm Xi‑oo tug ntxhais rooj loog.

15. Ib tsoom tebchaws poob rua huv lub qhov taub kws puab khawb ca, hab puab txhais kwtaw maag rooj hlua kws puab cuab ca.

16. Yawmsaub tub qha nwg rua peb paub, nwg tub txav txem lawm. Cov tuabneeg limham tub maag tej kws puab txhais teg ua.

17. Cov tuabneeg phem yuav moog rua huv tub tuag teb, yog txhua haiv tuabneeg kws nov qaab Vaajtswv.

18. Vaajtswv yuav tsw nov qaab cov tuabneeg txom nyem moog le, hab cov tuabneeg pluag txujkev vaam yuav tsw nplaam moog ib txhws.

19. Au Yawmsaub, thov koj ca le sawv tseeg, tsw xob ca tuabneeg kov yeej, ca le txav txem rua ib tsoom tebchaws taab meeg ntawm koj xubndag.

20. Au Yawmsaub, ca le ua kuas puab ntshai, hab ua kuas ib tsoom tebchaws paub tas puab tsuas yog tuabneeg xwb.