Phau Ntawv Nkauj - Đoạn 89

1. Au Yawmsaub, kuv yuav hu nkauj txug koj txujkev hlub ruaj khov moog ib txhws. Kuv lub qhov ncauj yuav pav txug koj txujkev ncaaj kws tso sab tau rua txhua tam tuabneeg.

2. Kuv has tas koj txujkev hlub kws ruaj khov yuav nyob moog ib txhws, koj tsaa koj txujkev ncaaj nyob ruaj rua sau ntuj.

3. Koj has tas, “Kuv cog lug rua tug kws kuv xaiv ca lawm, kuv tau yeem lug rua kuv tug qhev Tavi tas,

4. ‘Kuv yuav tsaa koj caaj ceg nyob moog ib txhws hab kuv yuav ua rua koj lub zwm txwv nyob ruaj moog txhua tam tuabneeg.’ ”

5. Au Yawmsaub, ca lub ntuj qhuas koj teg num phemfwj, hab qhuas koj txujkev ncaaj rua thaus cov tuabneeg dawb huv tuaj txoos ua ke.

6. Tsua qhov sau ntuj leejtwg yuav pev tau zoo le Yawmsaub? Huv ib tsoom tuabneeg qaum ntuj leejtwg zoo cuag le Yawmsaub?

7. Koj yog tug Vaajtswv kws cov tuabneeg dawb huv ntshai rua thaus tuaj sablaaj ua ke, hab yog tug kws txaus ntshai kawg heev dua tej kws nyob ib ncig ntawm koj.

8. Au Vaajtswv Yawmsaub kws muaj fwjchim luj kawg nkaus, leejtwg muaj fwjchim luj ib yaam le koj? Au Yawmsaub, koj txujkev ncaaj kws tso sab tau nyob puag ncig koj.

9. Koj tswj rawv tej nthwv dej ndaas huv havtxwv. Thaus tej nthwv dej ndaas sab sab koj kuj tswj kuas nyob ntsag tu.

10. Koj tsoo tug nam zaaj Lahaj yaam nkaus le ib tug kws raug tua, koj swv koj txhais teg kws muaj fwjchim ua rua koj cov yeeb ncuab tswv tawg taag.

11. Lub ntuj yog koj le, lub nplajteb yog koj le. Koj tau tswm lub nplajteb hab txhua yaam kws nyob huv.

12. Saab peg hab saab nraag los yog koj tswm. Lub roob Thanpau hab lub roob Hawmoo qhuas koj lub npe xyiv faab hlo.

13. Koj txhais npaab muaj fwjchim hab koj txhais teg kws muaj zug hab koj txhais teg xws raug muab tsaa sab sab le.

14. Txujkev ncaaj nceeg hab qhov kws txav txem ncaaj yog lub taw tag koj lub zwm txwv, txujkev hlub ruaj khov hab txujkev ncaaj kws tso sab tau moog ua koj ntej.

15. Au Yawmsaub, cov tuabneeg kws paub qw zoo sab rua koj tau nyob kaaj sab lug, yog cov kws taug kev huv qhov kaaj kws tawm ntawm koj xubndag lug.

16. Puab zoo sab xyiv faab huv koj lub npe ib nub tsaus ntuj, hab puab qhuas ntxhas koj txujkev ncaaj nceeg.

17. Koj yog puab tug zug kws muaj fwjchim ci ntsaa ab. Vem koj hlub peb mas koj txhad tsaa peb txwm kub kuas sab,

18. tsua qhov peb daim phaj hlau kws thaiv yog Yawmsaub le, peb tug vaajntxwv yog Yixayee tug Vaajtswv kws dawb huv le.

19. Yaav thau u koj tau has huv zaaj yug quas toog rua tug kws lub sab xwb rua koj tas, “Kuv tau paab ib tug kws sab luj sab tuab, kuv tau tsaa ib tug kws kuv xaiv huv cov pejxeem lug kuas nyob lub chaw sab.

20. Kuv tau nrhav kuv tug qhev Tavi hab muab kuv cov roj kws dawb huv laub tsaa nwg.

21. Kuv txhais teg txhad nrug nraim nwg moog ib txhws, hab kuv txhais npaab yuav pub zug rua nwg.

22. Yeeb ncuab yuav ntxag tsw tau nwg, cov tuabneeg limham yuav quab yuam tsw tau nwg.

23. Kuv yuav tsoo nwg cov tshawj chim rua ntawm nwg xubndag, hab kuv yuav ntaus cov kws ntxub nwg kuas tuag.

24. Kuv txujkev ncaaj kws tso sab tau hab kuv txujkev hlub kws ruaj khov yuav nrug nraim nwg. Vem nwg tuav kuv lub npe nwg txwm kub yuav raug muab tsaa kuas sab.

25. Kuv yuav tsaa nwg txhais teg rua sau dej havtxwv hab tsaa nwg txhais teg xws rua sau tej haav dej.

26. Mas nwg yuav hu thov kuv tas, ‘Koj yog kuv leej txwv, yog kuv tug Vaajtswv hab yog txhwb zeb kws cawm kuv dim.’

27. Hab kuv yuav tsaa nwg ua tug tub hlub, ua tug vaajntxwv luj dhau tej vaajntxwv huv nplajteb huvsw.

28. Kuv yuav muab kuv txujkev hlub ruaj khov cob rua nwg moog ib txhws, hab tej lug kws kuv cog tseg rua nwg yuav nyob ruaj khov.

29. Kuv yuav tsaa nwg caaj ceg kuas nyob moog ib txhws, hab tsaa nwg lub zwm txwv nyob ntev le kws lub ntuj nyob.

30. Yog nwg tej tub ki tso kuv txuj kevcai tseg hab tsw ua lawv le kuv tej kevcai,

31. yog puab ua txhum kuv tej kaab ke hab tsw tuav rawv kuv tej lug nkaw,

32. mas kuv yuav xuas nplawm rau txem rua puab tej kev faav xeeb, hab xuas nplawm kav theej rau txem rua puab tej kev txhum.

33. Tassws kuv yuav tsw rhu kuv txujkev hlub kws ruaj khov ntawm nwg lug, hab tsw tso kuv txujkev ncaaj kws tso sab tau tseg.

34. Kuv yuav tsw rhuav kuv tej lug cog tseg hab tsw hloov tej lug kws tawm huv kuv daim tawv ncauj lawm.

35. Kuv tuav kuv txujkev dawb huv yeem lug ruaj ca. Kuv yuav tsw daag Tavi.

36. Nwg caaj ceg yuav nyob moog ib txhws, nwg lub zwm txwv yuav nyob ntev le lub nub rua ntawm kuv xubndag.

37. Yuav tsaa nwg nyob moog ib txhws yaam le lub hli kws ua timkhawv tseeb sau nruab ntug.”

38. Tassws nwgnuav koj muab nwg pov tseg hab tsw yuav lawm, koj npau tawg rua tug kws koj laub roj tsaa lawd.

39. Koj tau rhuav tej lug kws koj cog tseg rua koj tug qhev, koj tau ua rua nwg lub mom kub puag tsuas rua huv cov moov aav.

40. Koj muab nwg tej ntsaa loog huvsw tsoo tawg ua tej lub qhov, koj muab nwg tej chaw ruaj khov tsoo pob taag.

41. Txhua tug kws dua kev moog kuj lws nwg, tej tuabneeg zej zog kuj thuaj luag nwg.

42. Koj tsaa nwg cov tshawj chim txhais teg xws sab, koj ua rua nwg cov yeeb ncuab suavdawg zoo sab xyiv faab.

43. Koj tig nav ntaaj rua nwg hab tsw paab nwg nyob ruaj khov huv lub tshaav rog.

44. Koj rhu tug cwj ntawm nwg txhais teg moog, hab muab nwg lub zwm txwv laim rua huv peg teb.

45. Koj muab nwg lub noob nyoog hluas txav tuab lu, koj muab kev txaaj muag npug nkaus nwg lub plhu.

46. Au Yawmsaub, yuav ntev le caag? Koj yuav tswv nraim moog ib txhws lov? Koj txujkev npau tawg yuav kub yaam nkaus le suavtawg ntev le caag?

47. Thov koj ncu txug kuv swm neej kws ib vuag dua xwb. Koj tau tswm ib tsoom tuabneeg lug nyob dawb nyob do xwb.

48. Muaj ib tug tuabneeg twg kws yuav muaj txujsa nyob moog le tsw txawj tuag? Leejtwg yuav cawm tau nwg tug ntsuj plig dim huv tub tuag teb tug fwjchim?

49. Au tug Tswv, koj txujkev hlub ruaj khov thau u dua twg lawm? Koj tau cog tseg tas yuav pub rua Tavi lawv le koj txujkev ncaaj kws tso sab tau.

50. Au tug Tswv, thov koj ncu txug qhov kws koj tug qhev raug luas saib tsw taug le caag, hab qhov kws kuv rws ib tsoom tuabneeg tej lug thuaj rua nruab sab le caag.

51. Au Yawmsaub, koj cov yeeb ncuab thuaj luag kuv, puab luag tug kws koj laub roj tsaa lawd txhua kauj ruam.

52. Qhuas Yawmsaub moog ib txhws. Amee hab Amee.