Phau Ntawv Nkauj - Đoạn 86

1. Au Yawmsaub, thov tig ntsej noog hab teb kuv, tsua qhov kuv pluag hab txom nyem.

2. Thov tsom kwm kuv txujsa ca tsua qhov kuv fwm koj. Thov cawm koj tug qhev kws tso sab rua koj. Koj yog kuv tug Vaajtswv.

3. Au tug Tswv, thov koj hlub kuv tsua qhov kuv quaj thov koj taag naj taag nub.

4. Au tug Tswv, thov pub kuas koj tug tub qhe zoo sab tsua qhov kuv muab hlo kuv lub sab rua koj.

5. Au tug Tswv, koj yog tug kws zoo kawg hab zaam txem, koj txujkev hlub muaj nplua quas mag rua cov kws hu thov koj.

6. Au Yawmsaub, thov tig ntsej noog kuv tej lug thov, thov noog kuv lub suab taij thov.

7. Nub kuv raug txom nyem ceblaaj kuv thov hu koj vem koj yeej yuav teb kuv.

8. Au tug Tswv, dhau koj lawm tsw muaj ib tug timtswv twg yuav zoo cuag le koj, hab tsw muaj ib teg num twg kws yuav zoo cuag le koj teg num.

9. Au tug Tswv, txhua haiv tuabneeg kws koj tau tswm lug yuav tuaj pe rua ntawm koj xubndag, hab yuav qhuas koj lub npe kuas tau koob meej.

10. Tsua qhov koj luj kawg hab ua teg num phemfwj kawg, koj tuab leeg txhad yog Vaajtswv.

11. Au Yawmsaub, thov koj qha koj txujkev rua kuv sub kuv txhad ua tau lawv le koj txujkev tseeb, thov paab kuas kuv ua hlo ib sab paub ntshai koj lub npe.

12. Au tug Tswv kws yog kuv tug Vaajtswv, kuv yuav ua koj tsaug kawg kuv lub sab hab kuv yuav qhuas koj lub npe kuas tau koob meej moog ib txhws.

13. Tsua qhov koj txujkev hlub kws ruaj khov luj kawg rua kuv, hab koj tau tso kuv tug ntsuj plig dim lub qhov tub tub huv tub tuag teb lug.

14. Au Vaajtswv, cov tuabneeg khaav theeb tau sawv tseeg tiv kuv, ib paab tuabneeg kws ua nruj ua tswv nrhav txuv kuv txujsa, puab tsw quav ntsej koj hab.

15. Au tug Tswv, koj yog tug Vaajtswv kws khuvleej hab hlub, koj tsw chim sai, koj txujkev hlub kws ruaj khov hab koj txujkev ncaaj kws tso sab tau muaj nplua quas mag.

16. Thov tig khuvleej kuv, thov pub zug rua koj tug qhev, hab cawm koj tug nkauj qhev tug tub.

17. Thov ua ib yaam txujci qha koj txujkev hlub rua kuv, sub cov kws ntxub kuv txhad pum hab raug txaaj muag, vem Yawmsaub, koj tau paab kuv hab nplig kuv lub sab.