Phau Ntawv Nkauj - Đoạn 75

1. Au Vaajtswv, peb ua koj tsaug, peb ua koj tsaug. Koj lub npe nyob ze. Peb pav koj tej num kws phemfwj.

2. Koj has tas, “Txug lub swjhawm kws kuv teem ca lawm kuv yuav txav txem ncaaj nceeg.

3. Thaus lub nplajteb hab txhua tug kws nyob huv tseeg quas nkawg, kuv yog tug kws tuav lub nplajteb tej ncej kuas nyob ruaj khov.

4. Kuv has rua cov kws khaav theeb tas, ‘Tsw xob khaav theeb,’ hab has rua cov tuabneeg limham tas, ‘Tsw xob tsaa koj txwm kub,

5. tsw xob tsaa koj tug kub kuas sab hab tsw xob khaav theeb has lug tuam mom.’ ”

6. Qhov kws tsaa ua luj tsw yog tshwm saab nub tuaj lug lossws tawm saab nub poob tuaj, hab tsw yog tshwm huv tebchaws moj saab qhua lug,

7. tassws yog Vaajtswv yog tug txav txem, nwg txu ib tug qeg, tsaa ib tug sab.

8. Tsua qhov huv Yawmsaub txhais teg muaj ib lub khob muaj cov cawv txwv maab kws sws tim npau npuag quas vog puv nkaus. Nwg yuav muab cov cawv hov hliv rua puab haus mas tej tuabneeg limham huv nplajteb suavdawg yuav haus taag nrho khob ntawd.

9. Tassws kuv yuav zoo sab xyiv faab moog ib txhws, kuv yuav hu nkauj qhuas Yakhauj tug Vaajtswv.

10. Nwg yuav muab cov tuabneeg limham tug kub txav pov tseg, huas cov tuabneeg ncaaj nceeg tug kub mas yuav raug muab tsaa kuas sab.