Phau Ntawv Nkauj - Đoạn 7

1. Au Yawmsaub, kuv tug Vaajtswv, kuv cawm sav rua huv koj. Thov tso kuv dim txhua tug kws lawv caum kuv, hab cawm kuv,

2. tsaam tes puab muab kuv dua yaam le tsuv ntxhuav dua, hab muab kuv hai moog tsw muaj leejtwg cawm kuv dim.

3. Au Yawmsaub, kuv tug Vaajtswv, yog kuv tau ua le nuav, yog kuv txhais teg tau ua txhum,

4. yog kuv tau ua phem pauj kuv tej kwvluag qhov zoo, lossws yog kuv ca le laam lws kuv cov yeeb ncuab,

5. tes ca kuv cov yeeb ncuab lawv cuag hab nteg tau kuv, hab ca puab tsuj kuv txujsa rua huv nruab aav, hab muab kuv tug ntsuj plig tso rua huv cov moov aav.

6. Au Yawmsaub, thov sawv tseeg ua npau tawg quas vog, thov ca le sawv tiv kuv cov yeeb ncuab txujkev chim. Au kuv tug Vaajtswv, thov ca le tswm dheev, koj tub teem swjhawm txav txem lawm.

7. Ca ib tsoom tuabneeg suavdawg tuaj txoos ua ke nyob puag ncig koj, hab thov koj nyob quas tsawg rua qhov sab sau cov tuabneeg hov.

8. Yawmsaub txav txem rua ib tsoom tuabneeg. Au Yawmsaub, thov koj txav txem rua kuv lawv le kuv txujkev ncaaj nceeg hab lawv le kuv lub sab dawb paug.

9. Au Vaajtswv kws yog tug ncaaj nceeg, hab yog tug kws tshuaj tuabneeg txujkev xaav hab tuabneeg lub sab, thov kuas tej kev phem kws cov tuabneeg limham ua pluj taag nrho, hab thov tsaa cov tuabneeg ncaaj nceeg kuas nyob ruaj khov.

10. Kuv daim phaj thaiv yog Vaajtswv, kws cawm cov kws sab ncaaj kuas dim.

11. Vaajtswv yog tug kws txav txem ncaaj nceeg, hab yog tug Vaajtswv kws naj nub chim rua cov tuabneeg txhum.

12. Yog ib tug twg tsw ntxeev dua sab tshab, Vaajtswv yuav huv nwg raab ntaaj. Nwg tub saam raab neev nti rawv quas loo ca lawm.

13. Nwg tub npaaj nwg tej cuab yeej kws tua tuabneeg txhwj lawm, nwg ua nwg tej xub neev nti muaj nplaim tawg.

14. Saib maj, tug tuabneeg limham xeeb txujkev phem, hab suab txujkev limham huv lub plaab hab yug tau tej kev daag.

15. Nwg khawb qhov taub, nwg kuj poob rua huv tej qhov kws nwg khawb hov.

16. Nwg txujkev limham rov lug raug nwg taubhau, nwg txujkev ndais ntuj poob lug rua sau nwg taj taubhau.

17. Kuv yuav ua Yawmsaub tsaug vem nwg kev ncaaj nceeg, hab kuv yuav hu nkauj qhuas Yawmsaub kws Luj Dua Ndais lub npe.