Phau Ntawv Nkauj - Đoạn 64

1. Au Vaajtswv, thov koj noog kuv lub suab ywg, thov tsom kwm kuv txujsa ntawm cov yeeb ncuab kws txaus ntshai kawg le.

2. Thov muab kuv nraim kuas dhau cov tuabneeg limham tej tswvyim phem, hab nraim kuas dhau cov tuabneeg ua phem tej tswvyim.

3. Puab huv puab tug nplaig zoo yaam nkaus le huv ntaaj, hab muab tej lug nyaum tso yaam nkaus le nruab xub tshuaj lawm,

4. Puab nyob huv lub chaw zuv kev tua rua cov tuabneeg tsw txhum, puab tua taamswm tsw ntshai leejtwg le.

5. Puab tuav rawv puab tug tswvyim phem ruaj ruaj le, puab has txug qhov kws muab vuj hlua cuab tuabywv, puab xaav tas, “Leejtwg pum tau peb?”

6. Puab npaaj tswvyim phem has tas, “Peb tau xaav tswvyim ntse kawg le.” Tej kws tuabneeg xaav hab tej kws nyob huv puab lub sab yeej tub kawg le.

7. Tassws Vaajtswv yuav xuas neev tua puab mas puab yuav raug mob taamswm.

8. Vem yog tim puab tug nplaig nwg yuav ua rua puab puam tsuaj. Txhua tug kws pum puab yuav luag cu hau quas nyo.

9. Mas suavdawg yuav ntshai, puab yuav pav txug Vaajtswv tej num, hab ua tuab zoo xaav txug tej kws Vaajtswv tau ua lawd.

10. Ca cov tuabneeg ncaaj nceeg zoo sab xyiv faab rua huv Yawmsaub, hab cawm sav rua huv nwg. Ca txhua tug kws sab ncaaj qhuas nwg.