Phau Ntawv Nkauj - Đoạn 63

1. Au Vaajtswv, koj yog kuv tug Vaajtswv, kuv nrhav koj, kuv tug ntsuj plig nqhes nrhav koj. Kuv lub cev qaug zug taag xaav tau koj, yaam le cov aav kws qhuav nkig nkuav tsw muaj dej.

2. Kuv txeev pum koj huv lub chaw pe koj, hab pum ntsoov koj tug fwjchim luj hab tug fwjchim ci ntsaa ab.

3. Vem koj txujkev hlub kws ruaj khov zoo dua txujsa, mas kuv daim tawv ncauj yuav qhuas koj.

4. Kuv yuav qhuas koj taag kuv txujsa, kuv yuav tsaa kuv txhais teg thov rua koj lub npe.

5. Kuv tug ntsuj plig tsau npo yaam le noj zoo nqaj zoo qhauv, hab kuv daim tawv ncauj yuav qhuas koj xyiv faab hlo.

6. Thaus kuv pw sau txaaj kuv xaav txug koj, hab kuv tshawb nrhav koj ib mos kaaj ntug.

7. Vem koj yog tug kws paab kuv, kuv nyob huv koj phob tis tug duab ntxoo hu nkauj xyiv faab hlo.

8. Kuv tug ntsuj plig tuav rawv koj, koj txhais teg xws fwj kuv ca.

9. Cov kws nrhav txuv kuv txujsa, yuav nqeg moog rua huv qhov kws tub kawg huv nplajteb.

10. Puab yuav raug muab cob rua nav ntaaj nav rag, puab yuav ua qauv rua maa noj.

11. Tassws vaajntxwv yuav xyiv faab rua huv Vaajtswv. Txhua tug kws tuav Vaajtswv lub npe twv yuav qhuas ntxhas nwg, vem cov tuabneeg daag lub qhov ncauj raug muab kaw lawm.