Phau Ntawv Nkauj - Đoạn 62

1. Kuv tug ntsuj plig nyob tuabywv tog Vaajtswv ib leeg, kuv txujkev dim lug ntawm nwg lug xwb.

2. Nwg tuab leeg yog kuv txhwb zeb hab kuv txujkev cawm dim, hab yog lub chaw ruaj khov, kuv txhad tsw ua zug.

3. Mej txhua tug yuav koom ntaus ib leeg ntev le caag ua rua nwg qaug yaam le lub ntsaa loog kws pheeb zuav hab yaam le lub laj kaab kws tub yuav qaug?

4. Puab xaav muab nwg thawb poob ntawm lub meej mom. Puab zoo sab rua tej kev daag, puab lub ncauj foom moov, tassws puab lub sab tsawm foom.

5. Kuv tug ntsuj plig nyob tuabywv tog Vaajtswv ib leeg, vem kuv txujkev vaam lug ntawm nwg lug.

6. Nwg tuab leeg yog kuv txhwb zeb hab yog kuv txujkev cawm dim, hab yog kuv lub chaw ruaj khov, kuv txhad tsw ua zug.

7. Kuv txujkev cawm dim hab kuv lub koob meej nyob ntawm Vaajtswv, Vaajtswv yog kuv txhwb zeb luj hab yog kuv lub chaw cawm sav.

8. Cov pejxeem 'e, ca le tso sab rua Vaajtswv txhua lub swjhawm, ca le qha tej kws nyob huv mej lub sab rua nwg. Vaajtswv yog peb lub chaw cawm sav.

9. Cov tuabneeg ua yau tsuas yog ib paas cua xwb, cov tuabneeg ua luj kuj yog ib vuag dua xwb. Thaus muab kiv puavleej swb dhau, muab ob leeg ua ke tseed swb dhau ib paas cua.

10. Tsw xob tso sab qhov kws quab yuam luas, tsw xob vaam do qhov kws lws luas. Yog muaj nyaj txag ntau quas zug, tsw xob tso sab rua tej nyaj hov.

11. Vaajtswv tau has ib zag, kuv tau nov ob zag lawm tas tug fwjchim yog Vaajtswv le.

12. Au tug Tswv, txujkev hlub ruaj khov yog koj le, vem koj ua pauj rua tuabneeg lawv le tej kws puab ua.