Phau Ntawv Nkauj - Đoạn 55

1. Au Vaajtswv, thov koj tig ntsej noog kuv tej lug thov, thov tsw xob fee qhov kws kuv taij thov.

2. Thov koj tsaa qhov ntsej noog hab teb kuv. Kuv yeej zeem kuv tej kev txom nyem lawm lauj, kuv ntxhuv sab kawg

3. rua yeeb ncuab lub suab, tsua qhov kws cov tuabneeg limham tswm txom kuv. Puab coj kev ceblaaj txom nyem lug rua kuv, puab khaws tej kev ntxub kuv chim rua nruab sab moog le.

4. Kuv lub sab lwj quas ntsuav, qhov kws ntshai txujkev tuag poob lug tsuam kuv.

5. Txujkev ntshai ua ib ce tshee quas nyo kuj lug raug kuv, hab txujkev ceeb hab ntshai nyaab hlo kuv.

6. Mas kuv has tas, “Kuv xaav xaav muaj tis yaam le nquab txhad le yaa tau tswv moog nyob tug quas yeeg.

7. Kuv yeej yuav tswv moog deb deb, kuv yuav moog su huv tebchaws moj saab qhua.

8. Kuv yuav maaj moog nrhav chaw nraim cev moog nraim tej nam cua daaj cua dub kws hlub hlub.”

9. Au tug Tswv, thov ua kuas puab ntxhuv taag hab ua kuas puab has lug tsw sws paub, tsua qhov kuv pum kev limham ndais ntuj hab kev sws ntaus sws tua huv lub nroog

10. hab moog sau ntsaa loog puag ncig lub nroog nruab nub mo ntuj. Tej kev phem hab tej kev ceblaaj txom nyem muaj nyob huv lub nroog,

11. txujkev puam tsuaj muaj nyob huv plawv. Tej kev quab yuam kev ntxo luas lug noj lug haus muaj huv tej kab khw tsw tu le.

12. Tsw yog yeeb ncuab luag kuv xwb, tes kuv tub thev taug. Tsw yog cov kws tawm tsaam kuv khaav theeb rua kuv xwb, tes kuv tub tau chaw nraim,

13. tassws tub yog koj kws yog tug kws nrug kuv nyob sws luag sawv sws txwg, ua kuv phoojywg kwvluag ntaag.

14. Ib txeev sws thaam qha sab hlo, ib yeej koom ua ib lub sab moog rua huv Vaajtswv lub tuam tsev.

15. Thov txujkev tuag lug rua puab cov ntawd, ca puab nqeg caj quas tshav rua huv tub tuag teb, vem yog txujkev phem nyob huv puab lub tsev hab nyob huv puab lub sab.

16. Tassws kuv hu thov Vaajtswv mas Yawmsaub yuav cawm kuv dim.

17. Kuv tsaa suab ntsaaj suab ywg thaus sawv ntxuv thaus taav su hab thaus tsaus ntuj, mas nwg yuav noog kuv lub suab.

18. Nwg yuav tso kuv tug ntsuj plig dim tso sab quas lug ntawm qhov kws kuv ua rog, vem yog muaj tuabneeg coob coob sawv ntseg nreeg ua rog rua kuv.

19. Vaajtswv kws nyob sau lub zwm txwv kaav ib txwm thau u lug yeej yuav noog kuv tej lug thov hab yuav muab puab txu, vem yog puab tsw ntxeev dua sab hab tsw fwm tsw paub ntshai Vaajtswv.

20. Kuv tug kwvluag tsaa teg ntaus nwg tej phoojywg, nwg rhuav nwg tej lug cog tseg.

21. Nwg tej lug nplag heev dua le roj mig tassws kev ua rog nyob huv nwg lub sab, nwg tej lug mog lug muas heev dua le roj tassws tej lug hov yog raab ntaaj kws rhu hlo lug.

22. Ca le muab koj lub nraa tso plhuav rua Yawmsaub, mas nwg yuav tuav rawv koj, nwg yuav tsw ca cov tuabneeg ncaaj nceeg ua zug quas kais.

23. Au Vaajtswv, koj yuav muab cov tuabneeg phem laim pov tseg rua huv lub nam qhov kws tub kawg. Cov nam tuabneeg noj nyoog hab faav xeeb yuav tsw muaj txujsa nyob txug ib nraab ntawm puab lub noob nyoog. Kuv mas kuv yuav tso sab rua koj.