Phau Ntawv Nkauj - Đoạn 53

1. Cov tuabneeg ruag xaav huv lub sab tas, “Tsw muaj Vaajtswv.” Puab lub sab phem kawg le hab puab ua tej kev txhum kws qas vuab tsuab. Tsw muaj ib tug twg ua zoo hlo le.

2. Vaajtswv saib sau ntuj tuaj rua tuabneeg nplajteb, saib yuav muaj ib tug twg kws ntse hab nrhav Vaajtswv.

3. Puab txhua tug kuj poob ntawm Vaajtswv lawm, hab puab lub sab phem taag huvsw ib yaam nkaus. Tsw muaj ib tug ua zoo, tsw muaj hlo le.

4. Cov kws ua phem tsw paub le lov, yog cov kws noj kuv haiv tuabneeg yaam le noj ncuav, hab tsw taij thov Vaajtswv le?

5. Puab yuav nyob ntshai kawg ua sab puag tsug, ntshai heev dua le kws puab txeev ntshai, tsua qhov Vaajtswv ua rua cov tuabneeg kws tuaj ntaus mej tej pob txhaa dha rw quas sua. Mej ua rua puab raug txaaj muag tsua qhov Vaajtswv tub tso puab tseg lawm.

6. Xaav kuas muaj kev cawm dim tshwm huv Xi‑oo tuaj rua cov Yixayee. Thaus Vaajtswv pub nwg haiv tuabneeg rov vaam meej le qub, Yakhauj yuav xyiv faab, Yixayee yuav zoo sab.