Phau Ntawv Nkauj - Đoạn 52

1. Nam tuabneeg muaj fwjchim 'e, ua caag koj yuav khaav qhov kws koj ua phem? Vaajtswv txujkev hlub yeej muaj taag naj taag nub.

2. Nam tuabneeg daag 'e, koj ntaus tswvyim ua kuas puam tsuaj, koj tug nplaig ntse ib yaam le nav chais ntse.

3. Koj nyam kev phem heev dua kev zoo, koj nyam kev daag heev dua has tseeb.

4. Tug nam nplaig daag 'e, koj nyam has txhua lu lug kws ua kuas puam tsuaj xwb.

5. Tassws Vaajtswv yuav muab koj tsoo kuas puam tsuaj moog ib txhws, nwg yuav ntsab nkaus koj chua koj tawm huv koj lub tsev moog, nwg yuav muab koj dob huv cov tuabneeg caj lub tebchaws moog.

6. Cov tuabneeg ncaaj nceeg yuav pum hab yuav ntshai, hab yuav luag nwg has tas,

7. “Swm saib tug kws tsw kheev ca Vaajtswv ua nwg lub chaw cawm sav, nwg tso sab rua nwg tej kev muaj txag nplua nuj, hab muab qhov kws ua limham lug txhawb nwg tug zug.”

8. Kuv mas zoo yaam nkaus le tsob txwv aulib ntsuab ntsuab nyob huv Vaajtswv lub tsev, kuv tso sab rua Vaajtswv txujkev hlub kws ruaj khov moog ib txhab ib txhws.

9. Kuv yuav ua koj tsaug ib txhws le rua tej kws koj tau ua lug lawm, kuv yuav tshaaj tawm koj lub npe taab meeg cov kws fwm koj tsua qhov koj lub npe zoo kawg.