Phau Ntawv Nkauj - Đoạn 44

1. Au Vaajtswv, peb lub qhov ntsej tau nov hab peb tej laug tau pav txug tej num kws koj tau ua rua thaus puab swm neej yaav thau u.

2. Koj txhais teg tau lawv tej tebchaws tswv moog, huas koj cog peb tej laug nyob. Koj ua rua ib tsoom tuabneeg raug kev txom nyem, huas koj muab peb tej laug tso nyob ywj pheej.

3. Tsw yog puab tej ntaaj paab puab txeeb tau lub tebchaws hov, hab tsw yog puab txhais teg kov yeej, tassws yog koj txhais teg xws hab koj txhais npaab hab qhov kws koj tsaa qhov muag saib puab tsua qhov koj txaus sab rua puab.

4. Koj yog kuv tug vaajntxwv hab kuv tug Vaajtswv kws has tseg kuas Yakhauj kov yeej.

5. Vem yog muaj koj peb txhad le thawb tau peb cov tshawj chim, vem muaj koj lub npe peb txhad le tsuj tau cov kws tawm tsaam peb,

6. tsua qhov kuv tsw tso sab rua kuv raab neev nti, hab kuv raab ntaaj los cawm tsw tau kuv.

7. Tassws koj tau cawm peb dim ntawm peb cov tshawj chim hab ua rua cov kws ntxub peb raug txaaj muag.

8. Peb khaav txug Vaajtswv tsw tu le, hab peb yuav ua tsaug rua koj lub npe ib txhws moog le.

9. Los koj tseed tso peb tseg hab ua rua peb poob qeg, hab tsw tau tawm nrug peb cov tub rog moog.

10. Koj ua rua peb thim ntawm peb cov tshawj chim rov qaab, hab peb tej yeeb ncuab txeeb tau peb tej hov txhua chaw moog lawm.

11. Koj ua rua peb zoo yaam nkaus le tej yaaj kws yuav coj moog tua, hab ua rua peb tawg ua saab ua sua moog rua ib tsoom tebchaws.

12. Koj muab koj haiv tuabneeg muag pheejyim kawg le, koj tsw tau tshaaj thawj le.

13. Koj ua rua peb raug luas zej zog thuaj, ua rua peb raug cov kws nyob ib ncig peb luag hab saib tsw taug.

14. Hab ua rua peb moog tag luas ncauj luas lu rua huv ib tsoom tebchaws, hab ua lub chaw rua ib tsoom tuabneeg luag.

15. Kuv poob ntsej muag taag naj taag nub, hab kev txaaj muag npug nkaus kuv lub plhu,

16. vem yog raug tej lug kws luas thuaj luag hab saib tsw taug, vem yog cov yeeb ncuab hab cov kws cib nyeej.

17. Txawm yog peb tsw tau nov qaab koj hab tsw tau rhuav koj tej lug cog tseg, los txhua yaam nuav lug raug peb.

18. Peb lub sab kuj tsw faav xeeb peb txhais kwtaw kuj tsw ncaim ntawm koj txujkev,

19. los koj ca peb ntsoog taag rua huv maa tej chaw nyob, hab muab txujkev tsaus ntuj lug npug peb.

20. Yog peb tau nov qaab peb tug Vaajtswv lub npe hab tsaa teg rua luas tej daab,

21. tes Vaajtswv txawm tsw paub qhov nuav lawm lov? Tsua qhov nwg yeej paub tej kws peb xaav tuabywv huv lub sab.

22. Vem tim koj peb txhad raug muab tua taag naj taag nub, hab raug muab suav yaam le cov yaaj kws coj moog tua.

23. Au tug Tswv, ca le sawv tseeg, ua caag koj tseed pw tsaug zug? Ca le tswm dheev. Tsw xob muab peb tso tseg ib txhws.

24. Ua le caag koj yuav fee plhu ntawm peb? Ua caag koj yuav nov qaab qhov kws peb raug kev txom nyem raug quab yuam?

25. Peb tug ntsuj plig khoov moog ti nkaus aav, peb lub cev pua lua rua huv peg teb.

26. Thov koj ca le sawv tseeg lug paab peb, thov txhwv peb dim vem yog saib rua koj txujkev hlub kws ruaj khov.