Phau Ntawv Nkauj - Đoạn 41

1. Tug kws mob sab cov tuabneeg pluag kuj nyob kaaj sab lug, Yawmsaub cawm tug hov rua nub kws raug ceblaaj.

2. Yawmsaub tsom kwm nwg hab tuav nwg txujsa nyob, nwg raug hu tas yog tug kws tau nyob kaaj sab lug huv lub tebchaws. Koj yuav tsw muab nwg cob rua yeeb ncuab ua lawv le puab lub sab nyam.

3. Thaus nwg raug mob pw sau lub txaaj Yawmsaub tuav nwg. Thaus nwg mob koj khu nwg tej mob zoo huvsw.

4. Kuv mas kuv has tas, “Au Yawmsaub, thov koj hlub kuv, thov khu kuv, vem yog kuv tau ua txhum rua koj.”

5. Kuv cov yeeb ncuab has phem txug kuv tas, “Thaus twg nwg le tuag hab nwg lub npe puam tsuaj moog?”

6. Thaus ib tug twg tuaj tshaam kuv, nwg has lug daag xwb, tassws nwg lub sab khaws tej lug phem ca. Thaus nwg tawm moog nwg coj kuv lub moo moog xyaav rua txhua qhov.

7. Txhua tug kws ntxub kuv puab ntxhw quas tawg txug kuv, puab xaav phem rua kuv.

8. Puab has tas, “Muaj ib tug mob phem lug raug nwg lawm, nwg yuav tsw sawv huv nwg lub chaw pw le lawm.”

9. Txawm yog kuv tug kwvluag zoo kws kuv tso sab rua hab nrug kuv noj ua ke, los yuav tsaa lauj taw tuam kuv.

10. Au Yawmsaub, thov koj hlub kuv, thov tsaa kuv sawv sub kuv txhad ua pauj rua puab.

11. Yog le nuav kuv txhad paub tas koj txaus sab rua kuv, yog qhov kws kuv cov yeeb ncuab kov tsw yeej kuv.

12. Koj tuav kuv ca vem yog kuv lub sab ncaaj, hab muab kuv txawb rua ntawm koj lub xubndag moog ib txhws.

13. Ca le qhuas Yawmsaub kws yog cov Yixayee tug Vaajtswv, ib txwm thau u lug hab moog ib txhws tsw kawg. Amee! Amee!