Phau Ntawv Nkauj - Đoạn 40

1. Kuv ua sab ntev tog rawv Yawmsaub, nwg tig lug noog kuv tej lug thov.

2. Nwg nqug kuv tawm huv lub qhov kws ntshai kawg, yog tawm huv lub paag aav, hab muab kuv txhais kwtaw txawb rua sau lub pob zeb, ua rua kuv xwb taw nyob ruaj khov.

3. Nwg muab zaaj nkauj tshab tso rua huv kuv lub qhov ncauj, yog zaaj qhuas peb tug Vaajtswv. Tuabneeg coob coob yuav pum hab ntshai, hab yuav tso sab rua Yawmsaub.

4. Tug kws tso sab rua Yawmsaub kuj nyob kaaj sab lug, yog tug kws tsw tig moog nrhav cov tuabneeg khaav theeb lossws nrhav cov kws yuam kev moog pe daab.

5. Au kuv tug Vaajtswv Yawmsaub, koj tau ua ntau yaam phemfwj hab npaaj tseg ntau yaam rua peb, tsw muaj leejtwg zoo cuag le koj. Yog kuv yuav pav hab has txug tej hov mas muaj ntau dhau suav tsw txheeb.

6. Koj tsw xaav yuav tej tsaj hab tej hov txhua chaw kws muab xyeem, tassws koj tub qheb kuv qhov ntsej nov koj tej lug. Qhov kws tua tsaj hlawv xyeem hab xyeem daws txem, koj tsw tau rob.

7. Kuv has tas, “Kuv nyob nuav, huv thooj ntawv kuj sau txug kuv.

8. Au kuv tug Vaajtswv, kuv nyam ua lawv le koj lub sab nyam, koj txuj kevcai nyob huv kuv lub sab.”

9. Kuv tub has txuj xuv zoo txug txujkev cawm dim rua thaus cov tuabneeg coob coob tuaj txoos ua ke. Au Yawmsaub, koj yeej paub tseeb tas kuv tsw kaw kuv lub qhov ncauj ca hlo le.

10. Kuv tsw tau zais koj txujkev ncaaj nceeg ca rua huv kuv lub sab, kuv tub has txug koj txujkev ncaaj kws tso sab tau hab qhov kws koj cawm dim. Kuv tsw tau npog koj txujkev hlub kws ruaj khov hab koj txujkev ncaaj kws tso sab tau rua thaus cov tuabneeg coob coob tuaj txoos ua ke.

11. Au Yawmsaub, thov tsw xob tso qhov kws koj khuvleej kuv tseg, thov koj txujkev hlub kws ruaj khov hab koj txujkev ncaaj kws tso sab tau tsom kwm kuv moog ib txhws.

12. Tej xwm txheej phem vej kuv ntau kawg suav tsw txheeb. Kuv tej kev txhum lawv cuag kuv ua rua kuv tsw pum kev le, muaj ntau dua kuv tej plaubhau sau kuv taubhau. Kuv lub sab yaaj taag.

13. Au Yawmsaub, thov koj txaus sab cawm kuv dim, au Yawmsaub, thov maaj nroog tuaj paab kuv lauj!

14. Thov ca txhua tug kws tsom ntsoov txuv kuv txujsa raug txaaj muag hab lub sab ruag qhwv taag. Thov ca cov kws xaav ua rua kuv raug mob raug lawv thim rov qaab moog hab poob ntsej muag.

15. Thov ca cov kws luag nyos kuv poob sab nthaav vem puab raug txaaj muag,

16. Thov ca txhua tug kws nrhav koj xyiv faab hab zoo sab rua huv koj. Thov ca cov kws nyam koj txujkev cawm dim has tsw tu tas, “Yawmsaub luj kawg nkaus.”

17. Kuv mas pluag hab txom nyem, tassws tug Tswv tseed mob sab kuv. Au kuv tug Vaajtswv, koj yog tug kws paab kuv hab cawm kuv dim, thov tsw xob tog ntev.