Phau Ntawv Nkauj - Đoạn 36

1. Txujkev txhum has tub tub rua huv tug tuabneeg limham lub sab, nwg tsw paub ntshai Vaajtswv hlo le.

2. Nwg rov qhuas nwg tug kheej tas nwg tej kev txhum tsw muaj leejtwg pum tsw muaj leejtwg ntxub.

3. Nwg qhov ncauj has tej lug phem tej lug daag. Nwg tseg kag txujkev xyum txawj xyum ntse hab tsw ua qhov zoo.

4. Thaus nwg pw, nwg tsuas yog ntaus tswvyim phem xwb. Nwg npaaj ua qhov kws tsw zoo xwb, nwg tsw tso txujkev phem tseg.

5. Au Yawmsaub, koj txujkev hlub ruaj khov sab moog nto ntuj, koj txujkev ncaaj kws tso sab tau sab moog nto tej fuab.

6. Koj txujkev ncaaj nceeg zoo yaam le Vaajtswv tej roob, qhov kws koj txav txem ncaaj yaam le dej havtxwv. Au Yawmsaub, koj tsom kwm tuabneeg hab tsaj txhu.

7. Au Vaajtswv, koj txujkev hlub ruaj khov mas tswm txaj kawg nkaus. Ib tsoom tuabneeg moog cawm sav rua huv qaab koj phob tis tug duab ntxoo.

8. Puab noj tej kws muaj nplua quas mag huv koj lub tsev tsau npo, hab koj pub puab tau haus tug nam dej kws pub koj txujkev zoo txujkev xyiv faab.

9. Tsua qhov txuj hauv paug sav nyob ntawm koj, peb pum txujkev kaaj vem peb nyob huv koj qhov kaaj.

10. Thov koj ua koj txujkev hlub ruaj khov tshwm rua cov kws paub koj tsw tu le, hab ua koj txujkev cawm dim rua cov kws sab ncaaj sab nceeg.

11. Thov tsw xob kheev cov tuabneeg khaav theeb txhais kwtaw tsuj kuv, hab tsw xob kheev cov tuabneeg limham txhais teg lawv tau kuv tswv.

12. Saib maj, cov tuabneeg phem tub qaug lawm, puab raug laim pov tseg sawv tsw taug le lawm.