Phau Ntawv Nkauj - Đoạn 31

1. Au Yawmsaub, kuv lug cawm sav rua huv koj. Thov tsw xob ca kuv raug txaaj muag hlo le, ca le cawm kuv dim vem koj ncaaj nceeg.

2. Thov tig ntsej noog kuv, ca le cawm kuv kuas dim sai kawg nkaus. Thov koj ua txhwb zeb kws kuv nraim cev, yog lub chaw ruaj khov kws cawm kuv dim.

3. Koj yeej yog kuv txhwb zeb hab kuv lub chaw ruaj khov ntaag, thov saib rua koj lub npe es coj kuv hab qha kev rua kuv.

4. Thov tsw xob ca kuv maag rooj hlua kws cuab kuv, tsua qhov koj yog kuv lub chaw cawm sav.

5. Kuv muab kuv tug ntsuj plig cob rua huv koj txhais teg. Au Yawmsaub koj yog tug Vaajtswv tseeb kws tso sab tau, koj txhwv kuv dim lawm.

6. Kuv ntxub cov kws fwm tej txoov daab kws tsw muaj qaabhau, kuv tso sab rua Yawmsaub.

7. Kuv yuav zoo sab xyiv faab rua koj txujkev hlub kws ruaj khov, vem koj pum kuv txujkev txom nyem nyuaj sab, hab koj paub kuv txujkev ceblaaj,

8. hab koj tsw muab kuv cob rua huv yeeb ncuab txhais teg, koj muab kuv txhais kwtaw txawb rua lub chaw daav.

9. Au Yawmsaub, thov koj hlub kuv, vem kuv saamswm raug kev txom nyem nyuaj sab, kuv lub qhov muag plooj taag vem kuv lwj sab, kuv tug ntsuj plig hab kuv lub cev kuj qaug zug.

10. Kuv txujsa yau quas zug vem kuv txhawj xeeb lwj sab, hab kuv lub naj lub xyoos tsawg quas zug vem kuv ntsaaj quas lawg. Kuv tug zug pluj quas zug vem kuv txhawj xeeb, hab kuv tej pob txhaa sem quas zug moog.

11. Kuv cov tshawj chim suavdawg saib tsw taug kuv, kuv ua lub chaw rua kwvtij zej zog ceeb hab ntshai, kuv ua lub chaw rua kuv tej phoojywg ntshai sab puag quas zug. Cov kws pum kuv tom kev ca le tswv.

12. Puab tsw ncu kuv yaam le tug kws tub tuag lawd, kuv zoo yaam nkaus le lub taig kws tawg lawm.

13. Kuv nov tuabneeg coob sws ntxhw txug kuv. Muaj kev txhawj kev ntshai rua txhua faab. Puab tuav tswvyim tawm tsaam kuv, puab tuav huv txuv kuv txujsa.

14. Au Yawmsaub, kuv tso sab rua koj, kuv has tas, “Koj yog kuv tug Vaajtswv.”

15. Kuv lub caij lub nyoog nyob huv koj txhais teg, thov koj cawm kuv dim huv kuv cov yeeb ncuab hab cov kws tswm txom kuv txhais teg.

16. Thov koj lub ntsej muag ci rua sau koj tug qhev. Vem koj muaj txujkev hlub kws ruaj khov, thov cawm kuv dim.

17. Au Yawmsaub, thov tsw xob ca kuv raug txaaj muag, vem kuv tau quaj thov koj. Thov ca cov tuabneeg phem raug txaaj muag, thov ca puab lub suab ntsag tu moog rua huv tub tuag teb.

18. Thov muab daim tawv ncauj kws daag xaws, yog lub ncauj kws pheej has lug tuam mom khaav theeb, hab khaav txev saib tsw taug tug ncaaj nceeg.

19. Koj txujkev zoo muaj ntau kawg le lauj! Koj npaaj ca rua cov kws paub ntshai koj, hab muab rua cov kws cawm sav rua huv koj taab meeg ib tsoom tuabneeg.

20. Koj muab puab zais rua huv lub chaw nraim huv koj lub xubndag kuas dim tuabneeg tej tswvyim phem. Koj tuav rawv puab nyob tso sab plhuav rua huv qaab koj tug duab ntxoo, kuas dim tug nplaig kws sws caav sws tshe.

21. Qhuas Yawmsaub, tsua qhov nwg ua nwg txujkev hlub kws ruaj khov tshwm lug rua kuv phemfwj kawg rua thaus kuv raug vej yaam le lub moos kws raug yeeb ncuab vej.

22. Kuv poob sab nthaav has tas, “Kuv raug muab ntab tawm huv koj lub qhov muag lawm.” Tassws koj tseed nov kuv tej lug taij thov, rua thaus kuv quaj hu thov koj paab.

23. Yawmsaub cov tuabneeg kws dawb huv suavdawg 'e, ca le muab sab npuab nwg. Yawmsaub tsom kwm cov kws xwb rua nwg, tassws nwg pauj taub cov kws tsaab ua luj pov khawv nkaus.

24. Mej suavdawg kws tog rawv Yawmsaub, ca le ua khov kho hab ua sab luj sab tuab nawj!