Phau Ntawv Nkauj - Đoạn 30

1. Au Yawmsaub, kuv yuav qhuas ntxhas koj vem yog koj nqug kuv tawm lug hab koj tsw kheev kuv cov tshawj chim luag kuv.

2. Au Yawmsaub, kuv tug Vaajtswv, kuv tau hu thov koj paab kuv, mas koj tau khu kuv zoo.

3. Au Yawmsaub, koj tau coj kuv tug ntsuj plig tawm huv tub tuag teb lug. Kuv tub yuav moog rua huv qhov tuag tassws koj tau cawm kuv txujsa rov lug.

4. Yawmsaub cov tuabneeg kws dawb huv 'e, mej ca le hu nkauj qhuas nwg, hab ca le ua tsaug nwg lub npe kws dawb huv.

5. Qhov kws Yawmsaub chim mas yog ib vuag dua xwb, qhov kws nwg ua zoo mas muaj moog ib swm neej. Kev quaj lug kua muag mas muaj ib mo kaaj ntug tassws thaus sawv ntxuv yuav muaj kev xyiv faab.

6. Kuv tug kheej mas thaus kuv nyob kaaj sab quas lug kuv has tas, “Kuv yuav tsw ua zug hlo le.”

7. Au Yawmsaub, koj ua zoo rua kuv. Koj tsaa kuv nyob ruaj yaam le lub roob khov kho. Thaus koj fee plhu ntawm kuv lawm mas kuv txhad poob sab.

8. Au Yawmsaub, kuv thov hu koj. Kuv tsaa suab taij Yawmsaub tas,

9. “Yog kuv tuag lawd, yog kuv moog rua huv tub tuag teb lawm, mas koj yuav tau daabtsw? Tej moov aav yuav qhuas koj hab pav txug koj txujkev ncaaj kws tso sab tau lov?

10. Au Yawmsaub, thov tig ntsej noog hab hlub kuv. Au Yawmsaub, thov koj ua tug kws paab kuv.”

11. Koj muab kuv kev quaj ntsuag ntxeev ua kev dha seev cev. Koj muab kuv tej khaub seev tsaaj hle hab muab kev zoo sab xyiv faab rua kuv naav,

12. kuv tug ntsuj plig txhad tau qhuas koj hab tsw xob nyob tuabywv. Au Yawmsaub, kuv tug Vaajtswv, kuv yuav ua koj tsaug moog ib txhws.