Phau Ntawv Nkauj - Đoạn 25

1. Au Yawmsaub, kuv muab hlo kuv lub sab rua koj.

2. Au kuv tug Vaajtswv, kuv tso sab rua koj. Thov tsw xob ca kuv raug txaaj muag, tsw xob ca kuv cov yeeb ncuab nyos luag kuv.

3. Thov tsw xob ca ib tug twg kws tog rawv koj raug txaaj muag hlo le. Ca cov kws mom swm faav xeeb rua koj poob ntsej muag.

4. Au Yawmsaub, thov ua rua kuv paub koj txujkev, thov qha koj tej kev rua kuv paub taug.

5. Thov koj coj kuv taug koj txujkev tseeb hab qhuab qha kuv vem koj yog tug Vaajtswv kws cawm kuv dim. Kuv tog rawv koj taag naj taag nub.

6. Au Yawmsaub, thov koj ncu txug koj txujkev khuvleej hab koj txujkev hlub kws ruaj khov, vem yog tej nuav tub muaj thau u lug lawm.

7. Thov tsw xob ncu txug tej kev txhum hab tej kev faav xeeb kws thaus kuv tseed hluas es kuv ua. Au Yawmsaub, vem koj txujkev hlub kws ruaj khov hab koj txujkev zoo, thov ncu txug kuv.

8. Yawmsaub yog tug kws zoo kawg hab ncaaj nceeg, nwg txhad qhuab qha nwg txujkev rua cov tuabneeg txhum.

9. Nwg coj tug kws txu fwjchim moog qhov kws raug cai, hab qha nwg txujkev rua tug txu lub sab qeg qeg.

10. Yawmsaub tej kev huvsw yog txujkev hlub kws ruaj khov hab tso sab tau, rua txhua tug kws tuav rawv nwg tej lug cog tseg hab nwg tej lug qha.

11. Au Yawmsaub, thov koj saib rua koj lub npe es zaam kuv lub txem tsua qhov lub txem hov luj heev.

12. Leejtwg yog tug kws fwm hab paub ntshai Yawmsaub? Yawmsaub yuav qhuab qha tug hov rua huv txujkev kws tswm nyog nwg xaiv.

13. Nwg yuav tau nyob vaam meej heev, hab nwg tej tub ki yuav tau lub tebchaws ua puab teej puab tug.

14. Yawmsaub yuav nrug cov kws paub ntshai nwg ua phoojywg, hab nwg qha nwg tej lug cog tseg rua puab paub.

15. Kuv lub qhov muag pheej saib ntsoov rua Yawmsaub, tsua qhov nwg rhu kuv txhais kwtaw dim huv txuj hlua cuab.

16. Thov koj tig hlub kuv, tsua qhov kuv nyob twm kawv hab raug kev txom nyem nyuaj sab.

17. Thov paab kuv tej kev nyuaj sab kuas pluj, coj kuv tawm huv txujkev ntxhuv sab.

18. Thov tshuaj saib kuv tej kev txom nyem hab kev ceblaaj, hab daws kuv lub txem huvsw pov tseg.

19. Thov tshuaj saib kuv cov tshawj chim muaj coob npaum twg, hab puab ntxub kuv heev npaum le caag.

20. Thov tsom kwm kuv txujsa hab cawm kuv, tsw xob ca kuv raug txaaj muag vem yog kuv cawm sav rua huv koj.

21. Thov txujkev dawb huv hab txujkev ncaaj nceeg tuav kuv ca, vem kuv tog rawv koj.

22. Au Vaajtswv, thov txhwv cov Yixayee dim puab tej kev ceblaaj huvsw.